١٠ خطوات للتخلص من دهون البطن 💃🏻💃🏻

اللي عايز يتخلص من دهون البطن ، اوعده انه لو عمل بالنصايح دي حيلاقي نتايج مذهلة 🌹

في البوست ده انا مش حتكلم عن دايت ولا تمارين بطن خالص، الموضوع كله هو ١٠ حاجات لازم نتجنبها وحتنبهروا بالنتيجة( ده طبعا لو انتظمتوا على اللي حقوله ده 😉) 

١.اللبان (المستيكة او العلكة) :

طبعا حتستغربوا وتقولو مالها المستيكة ومال دهون البطن😳، انا حقولكم ازاي؛

مضغ اللبان حتى ولو كان خالي من السكر، بيسبب زيادة الوزن وخاصة دهون البطن، طب ليه بقى! 

شوفوا، عند مضع اللبان اللي بيحصل ان المخ بيبعت اشارات للمعدة ان في اكل جاي( حتى لو مش حتاكلي اصلا) وبالتالي بتقوم المعدة والجهاز الهضمي كله بالاستعداد عن طريق افراز العصارات الهضمية، وده طبعا حتحسوه بمنتهى البساطة بمجرد بدأ المضغ بتلاقوا اللعاب زاد،، الافرازات دي حتسبب احساس بالجوع وبالتالي حتاكلي على الرغم انك ماكنتيش جعانة اصلا قبل ماتمضغي اللبان

.

‎٢. الطعام المحتوي على نسبة عالية من الاملاح:

زي المخللات، المكسرات المالحة، الرنجة، الفسيخ، والاطعمة المعلبة اللي فيها نسبة املاح عالية زي الانشوجة .

الاملاح بتتسبب في حبس السوائل في الجسم وبالتالي صعوبة التخلص من دهون البطن،، ده بالاضافة كمان لمخاطر الاملاح الزيادة على ظغط الدم والجسم عموما.

٣. المأكولات السريعة (fast food) 

طبعا كلنا عارفين كمية السعرات الحرارية الماهولة في الاكلات دي، وطبعا بتتسبب في تخزين الدهون في الجسم وبالتالي دهون البطن،، طبعا بالاضافة لمخاطرها على الاوعية الدموية والقلب.

٤. المياه الغازية:

بجميييييع انواعها، المقصود هنا اي مشروب يحتوي على الصودا ( حتى لو بدون سكر او بسكر دايت) ، طب ليه بقى حتى لو بدون سكر ! حقولكم

المشكلة هنا في الصودا مش السكر، اولا بتسبب تكوين غازات وبالتالي انتفاخ، ثانيا بقى ودي الكارثة انها بتقلل جدا معدل حرق الجسم للدهون وكمان بتشجع الجسم على تخزين الدهون

يعني حضرتك تبقى عاملة دايت وعمالة تشربي في دايت بيبسي ومع ذلك مابتخسيش،.

خليكي قوية وقاومي وامنعي المشروبات دي فورا واوعي ترجعيلها تاني، واستبدليها بالعصاير الفريش او حتى ماية .

٥. المايونيز:

لو مش عايزة دهون في البطن يبقى انسي المايونيز، لانه بيحتوي على نسبة دهون عالية جدا، اكتر من ٨٠ ٪‏ من مكوناته دهون،.

طب نستبدله بإيه! ممكن استبداله بصوص طماطم فريش او ذبادي بدون دسم

. 

٦. البطاطس المقلية (french fries) 

دي بقى كارثة، لانها عبارة عن اسفنجة مليانة دهون مشبعة، طبعا بجانب تأثيرها على وظائف المخ، فا طبعا بتساعد في زيادة الوزن بسرعة جدا وبالتالي زيادي دهون البطن.

المشكلة كمان في البطاطس المقلية انك ممكن تاكلي منها كتير من غير ماتحسي و في الاخر تلاقي نفسك مثلا واكلة مثلا ١٠ بطاطسات من غير ماتحسي.

واللي حيقولي طب انا عندي القلاية اللي بدون زيت، حقولك دي ممكن بس تبقى مفيدة لو انتي اللي حتعملي البطاطس بنفسك، يعني مش البطاطس النص مقلية، لانها اصلا مشبعة بالدهون برضه.

حاولي استبدليها بتوست او خبز محمص بالفرن. 

٧. الايس كريم:

طبعا ده حبيب الملايين ، بس بقى لو عايزة تنزلي دهون بطنك لازم تبقى اقوى منه وتمنعيه تماما تماما مش تقلليه بس. انسيه من حياتك، او على الاقل الفترة دي لحد مانظبط دهون البطن، بعد كدة ممكن تاكلي منه في الاعياد مثلا 😄

الايس كريم هو كتلة من الدهون والسكر، ولكي ان تتخيلي بقى كمية الدهون اللي داخلة لجسمك وبالتالي على بطنك. 

 

٨. الاطعمة المسببة للانتفاخ:

طبعا الاطعمة دي بتسبب تكون الغازات وبالتالي انتفاخ البطن والقولون، بالاضافة الى انها بتبطأ حركة الامعاء وبالتالي انتفاخ وبطن اكتر.

زي ايه الاطعمة دي،، العدس بأنواعه، الفول، الحمص، اللوبيا والفاصوليا البيضاء، الكرنب، والبليلة والفول .

٩. المأكولات التي تحتوي على بدائل السكر ( سكر الرجيم) : 

مستغربين صح! 

حتقولولي ازاي ده سكر دايت ومافهوش سعرات طب ازاي حيتخن، حقولك. 

السكريات دي بس بيضطر ليها مرضى السكر لان مافيش خيار تاني او انهم بقى يمنعوا السكر تماما.

طيب بتخن ازاي! بدائل السكر دي للاسف بتكبر حجم المعدة، ومع الوقت حتلاقي اكلتك بتزيد وطبعا بطنك بتزيد

.

طب ايه الحل؟ 

الحل انك تستخدمي عسل النحل ( بس طبعا بكمية قليلة برضه) . 

١٠. واخيرا ، المشروبات الكحولية: 

بالاضافة لاحتواء بعض الانواع منها على سعرات حرارية، المشكلة التانية انها بتفتح الشهية، مش كدة وبس، دي كمان بتعطل مركز المخ المسئول عن الاحساس بالشبع، وبالتالي اللي حيشرب لازم حياكول من غير مايوقف.

د.سالي فتحي، اخصائية الطب النفسي وعلاج الادمان.
جروب الفيس بوك 
Beauty secrets with dr. Sally Fathy

لينك الجروب:

https://m.facebook.com/groups/1743509399258731?ref=m_notif&notif_t=like

بيدج الفيس بوك تحمل نفس اسم الجروب

لينك البيدج :

https://m.facebook.com/sallyfathyfahmy/?ref=m_notif&notif_t=like

تابعوني على قناتي على اليوتيوب

Sally with love channel

 :تابعوني على انستجرام 

@sallysonson

Derma roller. كل ما يخص الدرما رولر

السلام عليكم ورحمة الله وبركاته ، عيد سعيد علينا جميعا وكل سنة 

وحضراتكم طيبين. 

النهارده حنتكلم عن موضوع انتشر كتير فى الفترة الاخيرة فى مجال التجميل و هو الديرمارولر dermaroller . حنعرف دى ايه وبتشتغل ازاى على جلدنا و ايه فوايدها .

اولا : الديرمارولر هيا عبارة عن اله يدوية مكونة من جزء اسطوانى شبه بالظبط الالة اللى بتفرد العجين بس متركب فى الجزء ده سنون رفيعة جدا من مادة التيتانيوم وليها طول محدد على اساسه بيتحدد استخدامها.

ثانيا: ايه انواعها ، فى انواع لجلد الوجه وانواع لمنطقة حول العين وانواع لفروة الرأس. وكل نوع من دول تحته انواع تانية بيحددها طول السنون اللى بتتراوح من 0.5 مم الى 3 مم  

ثالثا : ايه استخداماتها ؟؟ 

1. تجديد خلايا الجلد واعطاء نضارة 

2. علاج اثار حب الشباب

3. تحسين الندبات الناتجة عن الحوادث او الجراحة

4. تحفيز توصيل بعض الادوية الموضعية الى داخل الجلد وفروة الرأس بالظبط زى فكرة الميزوثيرابى   

5. حالات سقوط الشعر و تجاعيد ما حول العين 

رابعا : ايه طريقة عملها ؟؟ 

بتعتمد فكرة الديرمارولر على ثقب الجلد فى اتجاهات مختلفة وباعماق مختلفة و ده فى حد ذاته بيحفز الكولاجين ميكانيكيا و بيخلق قنوات ممكن من خلالها توصيل ادوية لداخل الجلد خصوصا الادوية اللى موادها الفعالة حجمها كبير وبالتالى مش بتقدر تعدى من الجلد العادى زى الكولاجين وحمض الهيالويورنيك. 

مش بس كده دى حركة السنون بتخلق شحنات كهربائية برده بتحفز خلايا الجلد 

خامسا : طريقة استخدامها ؟ 

ببساطة يتم تخدير الجلد موضعيا عن طريق دهان مخدر قبل الجلسة بساعة ، ثم نقوم بتطهير الجلد عن طريق استخدام بيتادين ، بعده بنشيل البيتادين بمحلول ملح وبعد كده بنبدأ  فى شد الجلد بايدينا الشمال وتحريك الديرمارولر بالايد اليمين فى 4 اتجاهات وهيا افقى وراسى ومائل من الحانبين .. يعنى بالظبط كاننا بنرسم علم بريطانيا على الجلد 

بيحصل احمرار فى الجلد ولو بنشتغل باطوال زى 1.5 ل 3 مم بنلاحظ خروج دم بسيط  

بعدها بننضف الجلد كويس من اى دم عن طريق محلول ملح ونبدأ ندهن حاجات كتير موضعية زى هيالويوروتبك اسيد او فيتامين او .... او 

بنكتب للحالة دهان مضاد حيوى و واقى شمس واى دهان موضعية زى اللى قولنا عليها عشان نستفيد من ان الجلد مفتح ويفدر يوصل اى حاجة بسهولة 

الجلسات دى بتتعمل مرة او مرتبن فى الشعر على حسب طول السنون 

طيب سؤال مهم ؟؟؟ هل اقدر استخدمها بنفسي واجيبها منين ؟؟ وازاى انضفها بعد كل جلسة ؟؟ طيب ينفع حد يستخدمها معاية ؟؟ وهل مفعولها زى الليزر ؟ 

:-) من حيث الإستخدام الشخصى فده نقدر نعمله بس فى الانواع اللى سنونها فصيرة زى 0.5 مم و دى ممكن تستخدميها يوميا لو عاوزة ودورها هوا تحفيز خلايا الجلد مش اكتر بس مش بتأثر على الكولاجين لانها افصر من انها توصله 

:-) بنضفها عن طريق رش الكحول عليها بعد كل جلسه .... لو بنتكلم صح هيا المفروض للاستخدام الواحد وبعدها تترمى عشان كفاءة السنون بتقل لكن على مين احنا المصريبن لازم نقطع نفسها :-) :-)

:-) اجيبها منين ؟؟؟ دى مش بتتباع فى الصيدليات لكن بنجيبها من مندوبين شركات الادوية عن طريق الطبيب المعالج . سعرها يتراوح من 180 الى 250 ج حسب النوع و طول السنون وهكذا 

:-) ينفع اتنين يخمسوا فيها ؟؟ لأ طبعا دى للاستخدام الشخصى فقط   

:-) اما من حيث مفعولها فهى تعتبر حل متوسط الاهمية بتفيد ولكن طبعا مش زى الليزر ولكن ميزتها انى اقدر استخدمها بنفسي ، اقدر اعمل بيها جلسات فى الصيف عادى من غير ما اخاف من الحرارة والشمس و احنا كدكاترة نقدر نستخدمها فى الحالات اللى الوان بشرتهم غامقة وما ينفعش معاها فراكشنال ليزر fractional 

اتمنى البوست يكون فهمنا شوية ايه الديرمارولر و ايه فوايدها وادانا فكرة عن طريقة استخدامها .... عيد سعيد عليكم جميعا و الى لقاء قريب ان شاء الله :-) :-) :-)

االبوست من تقديم دكتورة السيدة طه، مدرس امراض الجلدية والتناسلية والتجميل ، كلية الطب جامعة الاسكندرية. 

تابعوني على؛

د.سالي فتحي، اخصائية الطب النفسي وعلاج الادمان.
جروب الفيس بوك 
Beauty secrets with dr. Sally Fathy

لينك الجروب:

https://m.facebook.com/groups/1743509399258731?ref=m_notif&notif_t=like

بيدج الفيس بوك تحمل نفس اسم الجروب

لينك البيدج :

https://m.facebook.com/sallyfathyfahmy/?ref=m_notif&notif_t=like

تابعوني على قناتي على اليوتيوب

Sally with love channel

 :تابعوني على انستجرام 

@sallysonson