علاج الشيب المبكر(الشعر الابيض)

زي ما بنقول، اذا عرف السبب بطل العحب 😊

*إحنا من البوست الاول عرفنا اسباب ظهور الشيب مبكرا، يبقى لو عالجنا الاسباب دي يبقى حلينا المشكلة. 😉

*تعالوا اقولوكم ازاي نعالجها 😍

1. زيادة تناول فيتامين B12:

انا قولت ان التغذية السليمة مهمة اوي للحفاظ على لون الشعر،، ومن اهمها فيتامين B12.
لازم تتأكدي انك بتستهلكي فيتامين B12 بكميات كافية ، لانه مهم جدا لانتاج صبغة الشعر.

لما بيقل فيتامين B12 بيسبب نوع من الانيميا اسمه Megaloblastic anemia ، ومن اعراضها ان الشعر بيفقد لونه الطبيعي.

طيب ناخده منين بقى الفيتامين ده!

فيتامين B12 موجود بنسبة عالية في المأكولات البحرية واللحوم الحمراء، منتجات الألبان زي الحليب والجبن والبيض.🌷

2. علاج الغدة الدرقية :

الغدة الدرقية لها تأثير على جميع الوظائف الحيوية من الجسم. نقص هرمون الغدة الدرقية ممكن أن يؤدي إلى ظهور الشعر الأبيض المبكر.
عشان كدة لازم نعمل التحاليل الازمة عشان نتأكد ان هرمون الغدة الدرقية في مستواه الطبيعي، ولو طلع منخفض يبقى لازم تعويض النقص ده (طبعا من قبل الطبيب المختص).💞

3. التدخين:

التدخين له آثار كتيرة سلبية على الجسم، ومنها أنه ممكن يسبب ظهور الشعر الأبيض مبكرا.😣

4. مضادات الأكسدة:

نظامك الغذائي الخاص ممكن جدا يساعد في منع حدوث الشعر الأبيض. عشان كدة مهم جدا اننا نتأكد من تناول ما يكفي من الأغذية الغنية بمضادات الأكسدة.

طيب زي ايه الاغذية دي! 😉

التوت والعنب والخضراوات الورقية الخضراء زي الخس والجرجير، الشاي الأخضر ، والشيكولاتة الداكنة(يفضل ان لا تقل نسبة الشيكولاتة الداكنة عن 70%).

5. الشاي الأسود:

من أروع الوصفات للشعر عموما وكمان فعالة للشعر الأبيض. 💞

الطريقة في منتهى البساطة 😉

2 ملعقة كبيرة شاي الأسود
و ماء

اغلب ملعقتين الشاي الأسود مع الماء وسيبيه يبرد شوية لدرجة حرارة الغرفة، بعدين توزعيه على فروة الرأس وسيبيه لمدة ساعة على الأقل.
بعدين اغسليه كويس بالماء فقط بدون استخدام الشامبوو.

الشاي الأسود مغذي للشعر و غني بالمواد المضادة للاكسدة و كمان بيساعد في الحد من نمو الشعر الأبيض. كمان بيساعد على تغميق لون الشعر وإضافة لمعة رائعة . 💟💟

6. زيت السمسم وزيت اللوز

ده بقى من أفضل العلاجات الطبيعية للشعر الأبيض.

طيب حنستخدمه ازاي بقى 🙈

اخلطي ملعقة صغيرة من زيت السمسم مع 4 معلقة صغيرة من زيت اللوز، و دلكي المزيج لمدة 20-25 دقيقة على فروة الرأس، وبعدين اغسلي بشامبوو خفيف.😍

زيت اللوز بيغذي الشعر، ويمنع التقصف، وبيزود إنتاج الميلانين، وبالتالي حيرجع الشعر للونه الطبيعي.
زيت السمسم بقى مقاوم  لعملية الشيب المبكر antiaging. 💞

*طيب دلوقتي اللي طلع عنده شعر ابيض، هل حيسيبه كدة ابيض لحد العلاج مايشتغل! 😯

اكيد لا طبعا، عشان جمالك ومظهرك العام لازم تغطي الشعر الابيض.

الافضل اننا نستخدم المواد الطبيعية زي الحنا، ويفضل البعد عن الصبغات الكيماوية.

طيب نستخدم الحنة ازاي ! 😉

شوفي ياقمر 😍

5 ملاعق كبيرة من مسحوق الحناء
1 ملعقة طعام من القهوة الفورية(نسكافيه)
1 كوب ماء

سخني الماية وضيفي القهوة الفورية وقلبي،
بعدين في وعاء تاني يكون فيه مسحوق الحنا ضيفي عليه ببطء القهوة و قلبي باستمرار عشان ماتكلكعش.
ضعي الخليط على شعرك وسيبيه لمدة ثلاث إلى أربع ساعات.
بعدين اشطفي بالماء الدافئ و القليل من الشامبوو الخفيف.
القهوة طبعا مفيدة للشعر وكمان بتدي لون حلو 😘

د.سالي فتحي، اخصائية الطب النفسي وعلاج الادمان.
جروب الفيس بوك 
Beauty secrets with dr. Sally Fathy

لينك الجروب:

https://m.facebook.com/groups/1743509399258731?ref=m_notif&notif_t=like

بيدج الفيس بوك تحمل نفس اسم الجروب

لينك البيدج :

https://m.facebook.com/sallyfathyfahmy/?ref=m_notif&notif_t=like

تابعوني على قناتي على اليوتيوب

Sally with love channel

 :تابعوني على انستجرام 

@sallysonson

اسباب الشيب المبكر (الشعر الابيض)

*طبعا مافيش شك ان بداية ظهور الشعر الأبيض مشكلة كبيرة وتسبب الحزن الى حد ما 😯.
احساس اول شعرة بيضا ممكن يكون حلو وممكن برضه يكون مؤلم وخصوصا لو حصل في سن الشباب. 😢

*طبيعي جدا ان الشعر يتحول للون الابيض مع تقدم العمر. لكن لو ده حصل في سن التلاتين واحيانا العشرين، اكيد بيكون محبط ومؤلم 😯.

*سواء كان الشعر رمادي او أبيض فده معناه ان شعرك بدأ يفقد صبغته الطبيعية. 😢

*طب ايه الاسباب اللي ممكن تخلي الشعر يفقد لونه وصبغته الطبيعية !

1. عامل الوراثة:

ده العامل اللي بيحدد في أي سن حيفقد شعرك لونه. بالنسبة لبعض الناس، ممكن أن ده يحصل قبل سن العشرين 😢 ،،  وبالنسبة للبعض الاخر ممكن جدا ظهور الشعر الابيض يتأخر لسن الخمسين 😍.

2. نقص الميلانين(يعني صبغة الشعر الطبيعية):

في معظم الحالات، نقص الميلانين بيكون السبب الرئيسي وراء تبييض الشعر. إنتاج الميلانين بيعتمد بشكل كبير على التغذية السليمة و تناول البروتين. اي خلل في توازن الغذاء ممكن جدا يقلل انتاج الميلانين.

3. الهرمونات:

الهرمونات لها تأثير كبير على لون شعرك. اي خلل ممكن أن يحول شعرك للون الأبيض 😯.

4. حالات مرضية اخرى:

بعض الحالات المرضية ممكن أن تؤدي إلى فقدان صبغة الشعر.
زي ايه طيب!
عندك مثلا نقص فيتامين B12،،  أو امراض الغدة الدرقية والغدة النخامية.😦

5. الإجهاد:

التوتر والاجهاد العصبي طبعا سبب رئيسي للشيب المبكر.
وطبعا كثرة تناول الكحول والوجبات السريعة الغير صحية ايضا ممكن يسرع من ظهور الشعر الابيض 😣.

6. منتجات الشعر الكيميائية:

للاسف استخدام الشامبوو المليء بالمواد الكيميائية، او صبغات الشعر، ممكن جدا يسبب ظهور الشعر الابيض مبكرا  😢.

7. عوامل خارجية:

زي ايه!
مثلا نوع المناخ اللي انتي عايشة فيه،  او تلوث البيئة  او بعض المهن اللي بيتعرض اصحابها للمواد الكيميائية.
كل دي عوامل بتسرع عملية الشيخوخة والشيب المبكر. 😯

حاربي التجاعيد والسيليوليت

البوست ده لو ماكنتش اهم بوست انا عملته، فاهو بجد من البوستات المهمة اوي اوي.
البوست ده حيغير كل حاجة في حياتك🌷

*خايفة من التجاعيد!...... انسيها خلاص
*عندك سليوليت!........ برضه انسيه
*جسمك جاف وخصوصا في البلاد الحارة اوي!....... ولايهمك
*جلدك وبشرتك كلها حاساها بدأت تكبر ونفسك ترجعيها زي بشرة الاطفال!...... 😉

بصي ياستي، الحل بسيط ومش مكلف، هو بس المعلومة مش عندك، وانا حديهالك 😘😘😘😘

الساحر اللي بتكلم عنه هو coconut oil زيت جوز الهند.💞

زيت جوز الهند مش بس مرطب قوي، لا ده مليان كمان فيتامين E  وده مضاد للاكسدة قوي جدا.

بالنسبة للسليوليت ، بعد شهر بس من الانتظام عليه حتلاقي فرق كبير جدا جدا.
جلدك حيبقى على طول طري وناعم ورائع.
تجاعيد الوش والخطوط الرفيعة، بنفسك حتشوفي الفرق.💞

طيب نستخدمه ازاي !

بصي ياستي، بعد كل شاور بعد ماتنشفي جسمك وقبل ماتلبسي وقبل ماتخرجي من الحمام، حتدهني جسمك كله بزيت جوز الهند،،، جسمك كله يعني كله؛ ايديكي ، رجليكي، بطنك، ضهرك، رقبتك، الابط، ومنطقة البيكيني ووشك.

طبعا حتلاقي نفسك تحولتي لجوزهنداية بتلمع وزي الفل 😀😀😀

لازم الدهان يكون وانتي في الحمام عشان المسام بتبقى مفتوحة والجسم دافي، وده طبعا بيدي نتايج احسن، عشان جسمك يتشربه كله.

ماتقلقيش ان جسمك حيكون مزيت شوية، ربع ساعة بالكتير وحتلاقي جسمك اتشربه كله.😍

اوعي تفوتي شاور من غير ماتدهني جسمك بعده، اوعي.
والله جسمك حيتحول، نعومة ونضارة وحيوية مذهلة.🌷💟

تجاعيد الوش حتقل جدا، ومش كدة وبس، ده انتي في نفس اللحظة حتحسي بالفرق.💟

وعلى فكرة تقدري ترطبي بشرتك منه الصبح وتنزلي، لانه فيه نسبة من عامل حماية الشمس  SPF  حوالي 8

استمري عليه وانتي بشرتك حتبقى زي بشرة البيبهات وحتدعيلي.

بس خودي بالك، مش اي زيت جوزهند اللي تجيبيه، بلاش تيجيبي النوع السايل لان جودته مش قد كدة.
هاتي الجامد اللي شبهه السمنة.😘

طبعا حتلاقيه موجود في اي سوبرماركت في الدنيا،، وعلى فكرة مش في قسم التجميل، ده في قسم زيوت الاكل 😀😀😀😀 اه والله زي مابقولك.🙈

افضل نوع لو عايزة تخدمي جسمك حلو، يبقى زيت جوزالهند البكر،، هاتي اي ماركة تعجبك، المهم يكون زي اللي في الصورة كدة، جامد شبهه السمنة وبكر 😉

وعلى فكرة ادهني شعرك منه برضه وشوفي الجمال والنضارة وماتغسيليهوش، بس ماتحطيش كمية كبيرة عشان مايزيتش😘😘😘

اخر معلومة بقى حقولهالك، إدي جسمك من جوة كمان زيت جوز الهند، ازاي بقى !

بصي ياستي يوميا خودي معلقة صغيرة منه وضيفيها لاي حاجة،، انا عن نفسي بحطها مع القهوة او النسكافيه 😉

واخيرا، اوعي اوعي اوعي تهملي في شرب الماية زي ماقولت قبل كدة 😉

وكعادتي قبل كل بوست ، اني بحب انفذه قبل ماكتبه على طول، فا أنا لسة عاملة كدة ومش قادرة اوصفلكم الاحساس الرائع اللي انا فيه، انتعاش واسترخاء وكمان نعومة ونضارة،، يعني ماحدش قدي 😀😀😀

د.سالي فتحي، اخصائية الطب النفسي وعلاج الادمان.
جروب الفيس بوك 
Beauty secrets with dr. Sally Fathy

لينك الجروب:

https://m.facebook.com/groups/1743509399258731?ref=m_notif&notif_t=like

اخطاء يجب تجنبها في الميك اب

انا كلمتكم قبل كدة عن الميك اب وقولتلكم شوية نصايح فيه، وعملت بوستين ، واحد للميك اب الخفيف ، وواحد تاني للبنات اللي بتحط ميك اب كامل.🌷💞
انهاردة بقى انا عايزة اكلمكم عن اخطاء بشوفها في بنات كتير في الميك اب وببقى متضايقة عشانهم جدا لاني ببقى نفسي اكلمهم وافهمهم اخطائهم دي. وان شاء الله صوتي حيوصلهم من خلال البوست ده. 💟
انهاردة لازم نتعلم الاخطاء ونتجنبها، وبعد كدة حبدأ معاكم سلسلة عن اصول و تريكات الميك اب الصح 😘
مبدأيا كدة خدوها قاعدة
Less is more
يعني كل ماتقللي كل مايبقى اجمل 🌷
زي مثلا اللي بيعمل حلويات، لو حطيتي سكر زيادة ، كدة خلاص باظت، مع انه سكر وحلو، بس كتره بوظ الدنيا.
نفس الفكرة في الميك اب،،، عايزة تحطي كل حاجة حطي، بس بالمعقول وبالاوصول.
وخليكي فاكرة،، الشطارة انك تبقى حاطة كل حاجة ومايبانش انك حاطة حاجة 😉

دلوقتي حكلمكم عن الاخطاء اللي بشوفها وازاي نتجنبها :

1. رسم الحواجب بقلم كحل العين: 😢
طبعا انا اتكلمت عن الموضوع ده قبل كدة وحذرت منه في بوست الميك اب، وانهاردة برضه حأكد عليه.
بجد من اسواء الحاجات اللي ممكن اي بنت تعملها في نفسها هو انها ترسم حواجبها بقلم الكحل،،، المنظر بيبقى مصطنع جدا جدا وباين جداااا،، ده غير انك بتؤذي حواجبك بالقلم ده لانه بيوقع شعر الحاجب.
الجمال في الميك اب انه يبرز جمالك ويبان طبيعي كأنك مش حاطة حاجة.
استبدلي قلم الكحل بأي شادو يكون افتح درجة من لون حواجبك. 💟

2. وضع كمية رهيبة من الاي شادو الابيض تحت العين :
طبعا اللي بتعمل كدة بتبقى متخيلة انها كدة بتنور وشها وبتظهر جمال عينيها، 😣 بالعكس بقى، المنظر بيبقى سيء جدا ومؤذي للعين.
استبدليه بهاي لايتر او اي شادو بيج فاتح وبكمية بسيطة جدااات.

3.تكبير الشفايف بالروج:
مش عشان شفايفك صغيرة وان الموضة الشفايف المليانة يبقى تكبريها بالروج،،، بالعكس، ايا كان شفايفك كبيرة او صغيرة، جمالها انك تظهريها زي ماهي بالظبط بنفس حجمها وبلون مناسب، لان اكيد ده الحجم اللي يناسب وشك.

4.مكياج الافراح : 😣😣😣
وما ادراكم ما مكياج الافراح، والله البنات اللي بتبالغ بتبقى شبهه حلاوة المولد 😀😀
أرجوكي بلاش وشك كله يبقى بيلمع، مش عشان ده فرح يبقى تحطي وشك في طبق جليتر وتنزلي 😀
ممكن لمكياج السهرة انك تستخدمي لون اي شادو غامق شوية او لون روج غامق او احمر.
لكن اياكي تحطي جليتر فوق عينك وعلى شفايفك ،، اختاريلك واحد منهم بس ياعينك يا شفايفك بس وماتنسيش زي ماقولت
Less is more

5.كريم الاساس الفاتح:
بجد من ابشع الجرايم اللي ممكن تعمليها في حق وشك انك تحطي كريم اساس افتح من لون بشرتك 😣 بيبقى منظر شنيع ، مافيش كلام يوصفه والله 😢
اختاري كريم الاساس اللي يكون نفس لونك بالظبط، ولو محتارة بين لونين هاتي الاغمق فيهم، ابعدي عن اي لون فاتح عن لونك تماما.
اللون الافتح من بشرتك غير انه بيبان انه مصطنع جدا، كمان بيجير الوش وبيخلي شكله شنيع.

6.لون الاي شادو :
مش لازم لون الاي شادو يبقى نفس لون هدومك، دي موضة السبعينات حضرتك 😀
اختاري لون الاي شادو اللي تحسيه مبين جمالك ولايق عليكي اكتر، وسيبك من هدومك،، وطبعا كل ما اخترتي الوان طبيعية اكتر، زي درجات البيج والبني، كل ماكان اجمل وحتقدري تلبسي اي حاجة تعجبك، لان كله حيمشي معاه.

7.احمر الخدود :
ارجوكي بلاش حكاية البلاشر اللي بيتحط على الاورة والمناخير والدقن دي 😀
البلاشر يتحط على خدودك بس، تحت عضمة الخد.

8.مراعاة المكان والزمان :
يعني لو نازلة شغلك الصبح بلاش تبالغي في رسم عينك والوان الاي شادو والروج، بالعكس خليكي هادية اجمل، وخلي الالوان دي لبالليل.

9.شنطتك:
اللي حتحتاجيه معاكي في شنطتك وانتي برة هو الروج بس، لانه اكيد حيتمسح منك مع الاكل او الشرب، ومش حلو انك تبقى حاطة ميك اب وشفايفك فاضية.
ارجوكي بلاش تحطي ماسكرا معاكي في الشنطة، لان الماسكرا لما تنشف وتحطي عليها تاني ، حلاص كدة انتي بوظتي الدنيا، حتلاقي رموشك كلكعت ولزقت في بعض ومش حتعرفي تفكيها 😊
ممكن تاخدي معاكي الكونسيلر، عشان لو الكحل ساح تحت عينك لازم تمسحيه وطبعا الكونسيلر حيتمسح معاه، فا ممكن تزودي.
ممكن لو حتطولي برة البيت ، تاخدي معاكي في شنطتك احمر الخدود ( البلاشر ) .

د.سالي فتحي، اخصائية الطب النفسي وعلاج الادمان.
جروب الفيس بوك 
Beauty secrets with dr. Sally Fathy

لينك الجروب:

https://m.facebook.com/groups/1743509399258731?ref=m_notif&notif_t=like

اسرار الجمال 3

من ضمن مشاكل العرق اللي بتواجه اي بنت هو العرق بين الافخاد، اللي طبعا ممكن يسبب التسلخ والروايح الغير مقبولة 😣😣

بس الموضوع ده محلول ، وحله بسيط اوي ومش حيكلفك اي حاجة.💞💞

استخدمي الdeodrant لمنطقة بين الافخاد 😉 

حيديكي ريحة تجنن طول اليوم 🌷🌷🌷 وكمان حيمنع التسلخ والاحتكاك اللي هو من اهم اسباب اسمرار اللون في المنطقة دي.

مهم اوي انك تخصصي مزيل عرق لمنطقة الافخاد، يعني ماتستخدميش نفس المزيل للابط والافخاد سوا. 🌷🌷

وده النوع اللي انا بحبه 💟 

بس تجيبي 2 ، واحد للابط وواحد تاني للافخاد 😘

ماتنسوش تشوفوا اسرار الجمال 1 و 2 💞

د.سالي فتحي، اخصائية الطب النفسي وعلاج الادمان.
جروب الفيس بوك 
Beauty secrets with dr. Sally Fathy

لينك الجروب:

https://m.facebook.com/groups/1743509399258731?ref=m_notif&notif_t=like

اسرار الجمال 2

مشكلة العرق. 😦🙈

بنات كتير للاسف بتعرق جدا من منطقة الابط ومهما تستخدم في مزيلات عرق برضه الهدوم بتتبل وبيبقى شكلها محرج احيانا 😢

بس خلاص مع السر اللي حقولهولك خلاص حتنسي الموضوع ده 😉

Panty liner 

المفروض انك بتستخدميه للبانتي، وانا كنت متكلمة عنه في بوست العناية بمنطقة البيكيني، اللي ماشافش البوست ده يدخل يشوفه حيعجبكم جداااااا.

 احنا بقى حنستخدمه بطريقة ذكية عشان تخلصي من بلل هدومك للابد 💟

حتلزقيه في هدومك من جوة زي ما الصورة موضحة بالظبط 💞

وطبعا بعدها انسي بلل هدومك خلاص 😉

وطبعا حتستخدمي مزيل العرق الاول اللي بتحبيه، عشان بس ريحتك تبقى حلوة😘😘

وده ال deodrant اللي انا بحبه 💞

جربوها وحتدعولي 😉😙💞

د.سالي فتحي، اخصائية الطب النفسي وعلاج الادمان.
جروب الفيس بوك 
Beauty secrets with dr. Sally Fathy

لينك الجروب:

https://m.facebook.com/groups/1743509399258731?ref=m_notif&notif_t=like

اسرار الجمال 1

الشفايف زي اي جلد في الجسم، بتكون طبقات من الجلد الميت ولازم تتخلصي منه 🌷

عشان لون شفايفك يبقى مورد وجميل وتتخلصي من اللون الغامق او الجلد الناشف تعملي ايه !😉

كل يوم الصبح وانتي بتعملي روتين بشرتك ، امسحي شفايفك كويس اوي اوي اوي بقطنة مبلولة من تونر الشاي الاخضر من بادي شوب.

لو ماعندكيش مش مهم، امسحيها بإسكانول.

لو ماعندكيش امسحي بتونر نيفيا او اي تونر عندك ( بس النتيجة حتكون اضعف شوية ) ممكن تخلطي حبة من التونر بعصير نص ليمونة عشان تحسني النتيجة 😉

*طبعا حتلاقي القطنة بقى لونها غامق من الجلد الميت اللي اتشال.😉

*بعد ماتخلصي مسح كويس حتحسي ان شفايفك منتعشة وكأنها بتتنفس.😍😍😍

لازم بعدها فورا تحطي مرطب شفايف عشان ماتنشفش.

طبعا مرطب bath and body works وهمي.

لو ماعندكيش حطي اي زبدة كاكاو، المهم ترطبيها بعد المسح فورا 😘😘😘😘

د.سالي فتحي، اخصائية الطب النفسي وعلاج الادمان.
جروب الفيس بوك 
Beauty secrets with dr. Sally Fathy

لينك الجروب:

https://m.facebook.com/groups/1743509399258731?ref=m_notif&notif_t=like

فقد الوزن بسهولة

**البوست ده حتكلم فيه عن حلم كل بنات الارض 😀 وهو انك تخسي بسهولة من غير ادوية ولا رجيم ولا رياضة لفترات طويلة ومرهقة.

*طب ازاي ! وهل ده ممكن فعلا ولا ده خيال !
لا مش خيال وحتخسي لو سمعتي كلامي وعملتي بكل حرف في البوست ده.

1.عشان تخسي لازم القرار يطلع من جواكي الاول، يعني ايه:
يعني كل ذرة في جسمك تكون مشبعة بالحلم ده، مش مجرد كلام وخلاص.
يعني تكوني فعلا عايزة تخسي بجد وراسمة صورة في خيالك لجسمك بعد ماتخسي وعايزة توصليلها.
يعني مش تبقى مجرد كلمة بتقوليها وخلاص، اه اخس وماله، يالا بينا، وانتي لسة مش حاسة بيها.
صدقيني مهما عملتي في دايت واخدتي ادوية، عمرك ماحتخسي طول ما الحلم مش مالي كيانك.
لو شايفة حلم التخسيس لسة مش ماليكي، يبقى هيئي نفسك للحلم الاول وبعدين ابدأي.
*صدقوني دي اهم خطوة في الموضوع كله، ولو وصلتي للمرحلة دي، يبقى بجد مبروك حتخسي. 💟
لو حققتي النقطة دي يبقى انقلي للنقطة الجاية.

2. الدايت:
انا ضد فكرة الدايت والرجيم نهائيا،، ضد فكرة انك تحرمي نفسك من حاجة انتي بتحبيها. فكرة الحرمان دي ولو لمجرد يوم واحد بس بتخليكي تاكلي بعدها اكتر من الاول.
يبقى اتفقنا مافيش دايت،، اومال حنخس ازاي؟
حقولك :
*قبل ماتكلي اي حاجة مهما كانت بسيطة، سيبيها تعدي على مخك الاول،، يعني فكري لمدة ثانية واحدة هل انا فعلا محتاجة دي، هل اقدر استغنى عنها ولا حيجرالي حاجة لو ماكلتهاش 😀
حتلاقي نفسك بتسيبي اكل كتير وعك كتير كلنا بنعكه على مدار اليوم،، بس زي ماتفقنا عديها على مخك الاول 😉
*النقطة دي مهمة جدا، اي اكل تعديه على مخك الاول اوعي تنسي ، لو لاقيتي نفسك عايزة تكليها يبقى كلي بالهنا والشفا 😀

3. الفطار:

بلاش تفطري بدري، عكس مالناس كلها فاهمة انك لازم تفطري والفطار اهم وجبة والكلام ده.

احنا عايزين نحرق دهون جسمنا ، وده مش حيحصل الا اذا وانتي في حالة صيام، ماعدا الماية طبعا.
لو فطرتي بدري، الانسولين حيطلع في دمك وده بطل الابطال في تخزين الدهون في الجسم.
يبقى تحاولي تأخري اول وجبة ليكي على قد ماتقدري، انا مش ححد وقت ، انتي وشطارتك 😉
حتبقي صايمة عن الاكل تماما، ولا شاي بلبن ولا نسكافيه بلبن ولا  فواكه ولاحاجة، المسموح بس هو الماية وممكن قهوة بدون لبن او سكر.
في الفترة دي حتشربي ماية كتييييييير جدا ، ودي طبعا مهمة، وتقدروا ترجعوا للبوست اللي عملته عن اهمية شرب الماء 💞💞
مثال: لو انتي بتفطري الساعة 8، حاولي خليها 10، ابدأي بتأخير الوجبة ساعتين بس وزودي بالتدريج على قد ماتقدري. اظن سهلة دي
في المرحلة دي جسمك حيبقى في حالة حرق ، خليكي فاكرة الكلمة دي كويس عشان تتشجعي 💪

وده من الحاجات اللي بتعلي معدل حرق الجسم 💞

4.دي ابقى اهم نقطة في البوست كله، هما بصراحة كل نقطة اهم من التانية 😀
عايزة تخسي بسرعة ملحوظة وبأقل مجهود يبقى الحل هو ده TABATA
ايه tabata ده ؟
دي عبارة عن تمارين حتعمليها كل يوم الصبح ومدتها 10 دقايق بس والله.
فكرتها انك بتعملي رياضة عنيفة لمدة 20 ثانية وتريحي 10 ثواني وهكذا. طبعا دي مفيدة للقلب و لشد الجسم. يعني اي واحدة عندها ترهل في اي مكان خلاص انسيه.
اول مرة حتعملي التمرين ده حتحسي تاني يوم ان جسمك كله مدغدغ، اطمني يومين ثلاتة وحيفك، ولما يفك ابدأي ارجعي للتمرين تاني بصورة يومية.
مشكلتنا كلنا كانت الكسل من اننا نروج جيم او نلعب رياضة لفترات طويلة، لكن tabata حلت القصة دي، في 10 دقايق بس حتحرقي اللي بيتعمل في ساعة رياضة واكتر .
وعلى فكرة ، جسمك حيفضل يحرق طول اليوم مش وقت التمرين بس، ومعدل حرق جسمك للدهون مش حيعلى بس، لا حيقفززززز بجد،، وعلى فكرة ده مش كلامي ده كلام الطب.

tabata ده اسم دكتور ياباني، هو اللي اكتشف الفكرة دي.
اليوتيوب مليان فيديوهات عن tabata ،، انا ححوط لينك الفيديو اللي انا بستخدمه شخصيا، مش بيكمل 10 دقايق كمان.

https://youtu.be/UoL4Tqk_ih0

وكمان في 

Applications 

 كتيرة جدا ، نزلي اي واحد منهم، ده بيديكي جرس بعد 20 ثانية و10 ثواني زي مافهمتكم.
ودي صورة اللي انا بستخدمه

والله ياجماعة tabata بتحرق بصورة خرافية، وحتلاقي نفسك كل يوم بتخسي عن اليوم اللي قبله.💞
اظن كدة سهلة ومالكيش حجة بقى 😉

* اوعدك لو عملتي بكل كلمة في البوست حتخسي بجد، وابقي افتكريني بدعوة حلوة 💟

د.سالي فتحي، اخصائية الطب النفسي وعلاج الادمان.
جروب الفيس بوك
Beauty secrets with dr. Sally Fathy

لينك الجروب:

https://m.facebook.com/groups/1743509399258731?ref=m_notif&notif_t=like

ختان الاناث

**للاسف احنا في القرن الواحد وعشرين ولسة بنتكلم في الموضوع ده، اللي هو يعتبر مأساة بكل ماتحمله الكلمة من معنى 😢

**تخيلوا ان منظمة الصحة العالمية بتسميه "تشويه الاعضاء التنلسليى للإناث" 😯

FGM : female genital mutilation. 

انا ححاول في البوست ده ألخصلكم الموضوع وافهمكم جذوره..

■تاريخ الختان:

**الختان موجود من ايام القدماء المصريين، والدليل على كدة هو وجود موميات مختنة،، وانتشر من عندهم لدول حوض النيل وبعدين لشبه الجزيرة العربية.

** العرب في الجاهلية كانوا بيعملوا الختان كعادة،، اللي هي وصلتلهم من مصر زي ماقولت،، ولما جاه الاسلام مامنعهاش ولا شجعها.

**للاسف لحد انهاردة‏ الختان واسع الانتشار في‏ إفريقيا،‏ مصر، السودان، السعودية واليمن والعراق والأردن،‏ ‬وإلى حدّ‏ ‬ما،‏ ‬في‏ سوريا.

■أسباب الختان:

للاسف بيعتقد الناس اللي بتعمل الختان أنه حيزيد من فرصة زواج بناتهم أو أنه سيحمي اسم العائلة، او انهم كدة بيحافظوا على عذرية البنت من خلال التقليل من رغبتها الجنسية،،، وده طبعا كلام غلط لان لو الرغبة الجنسية مكانها في الاعضاء التناسلية ماكانش على الاقل اامراض الاكتئاب والتوتر بتقلل من الرغبة.

***الرغبة مكانها العقل مش الاعضاء التناسلية،، من باب اولى بقى يروحوا يختنوا عقلهم 😕 

ده غير كمان الخرافات المتعلقة بالختان، زي أن البظر سينمو مع نمو الفتاة عشان كدة لازم يتشال،، او أن الجزء الخارجي من الأعضاء التناسلية غير نظيف وممكن يسبب موت الجنين أثناء الولادة. 😡

■انواع الختان:

النوع الاول : Type 1

في النوع ده زي ما الصور موضحة، بيتشال جزء من البظر او كله.

النوع الثاني: Type 2

بيتشال البظر وجزء من الشفة الصغيرة او كلها.

النوع التالت: Tpye 3

بيتشال البظر والشفة الصغيرة والكبيرة.

النوع الرابع : Type 4

بيتشال كل الاعضاء الخارجية، يعني البظر و الشفة الصغيرة والكبيرة.. مش كدة وبس،، دول كمان بيخيطوا الفرج ويسيبوا فتحة صغيرة يادوب تعدي البول ودم الدورة.

وماتفتكروش ان النوع ده مش بيتعمل،، انا شوفته بعيني ايام الامتياز في الكلية.

النوع التالت ده بيسموه في مصر الطهارة السوداني، وفي السودان بيسموه الفرعوني،،، لان ده غالبا النوع اللي كان بيتعمل ايام الفراعنة ،، والنوع ده هو اكتر نوع منتشر في دول افريقيا.

** وعلى فكرة زماااان روما  كانت بتعمله لمنع ممارسة الجنس بين العبيد‏.‬ 😕

الصورة موضحة الاربع انواع،، وفيه صورتين للنوع التاني زي ماشرحته.

الصورة دي بتوضح الاربع انواع بالترتيب من اليسار لليمين.

■فوائد الختان:

مافيش ولا فايدة واحدة طبية مثبتة للختان بتاتا،، متخيلين !!!

■اضرار الختان :
تختلفُ الآثار الصحيَّة لِختان البنات باختلاف طبيعيَّة العمليَّة، فقد تُعاني المختونة من التهاباتٍ مُتكررة، وصُعوبةٍ في التبوُّل وفي تدفُّق الطمث، وبُروز خرَّاجات، وصُعوبةٌ في حمل الجنين، ومُضاعفاتٌ عند الولادة، ونزفٌ مُهلك.[8] ولا تُعرفُ أيَّة فوائد صحيَّة لِهذه العمليَّة.[9]

1.النزيف: طبعا في حالات كتير بيؤدي للموت، ودي برضه شوفتها بعيني ايام الامتياز 😢

2.العدوى: طبعا لو الادوات المستعملة غير نضيفة (زي مابيحصل غالبا في الارياف)ممكن يتلوث الجرح ويتحول إلى خُراج.

3.ألم رهيب: في الغالب بيتم الختان بدون تخدير؛ وطبعا الألم بيكون أسوء في اليوم الثاني لما تبدأ البنت تتبول.

4.مشكلات في التبول. في الحالات الشديدة، بيتبقى فتحة صغيرة للتبول ولخروج دم الدورة، وده طبعا حيسبب بطء تدفق البول وبالتالي حدوث التهابات متكررة في مجرى البول.

5.عدم القدرة على ممارسة الجنس بصورة طبيعية.

6.زيادة مخاطر انتقال العدوى الجنسية، بما فيها عدوى الإيدز، او الالتهاب الكبدي الوبائي،  وده بسبب استخدام ادوات بدون تعقيم.

7.مشكلات في حدوث الحمل، او مشكلات أثناء الحمل والولادة. وده غالبا بيكون بسبب عدم القدرة على ممارسة العلاقة الجنسية. ولو حصل الحمل، بتكون السيدة عرضة لطول فترة الولادة والتمزق والنزيف الحاد  أثناء الولادة.

8.الضغط النفسي والعاطفي. للأسف الآثار النفسية الناتجة من هذه التجربة المؤلمة بتشبه جدا اضطراب ما بعد الصدمة،، ده غير مشكلات النوم والقلق والاكتئاب. 😢

ياترى بعد كدة حنلاقي لسة ناس بتسأل على الختان او بتفكر لسة تعمله ولا لا 😨

بعض الناس بعد عملية الختان بيربطوا رجلين البنت بالطريقة دي عشان يساعدوا ان الجرح يقفل 😡

.

د. سالي فتحي، اخصائية الطب النفسي وعلاج الادمان

جروب الفيس بوك

Beauty secrets with dr. Sally Fathy

لينك الجروب

https://m.facebook.com/groups/1743509399258731?ref=m_notif&notif_t=like

الاضطرابات الجنسية الجزء الثاني

**المرة اللي فاتت اتكلمنا عن اضطراب اول مرحلة من مراحل الدورة الجنسية الطبيعية وهي مرحلة الرغبة.

**انهاردة حنتنقل لاضطراب تاني مرحلة من الدورة الجنسية الطبيعيه و هى مرحله الاستثاره arousal.

*المرحلة دي بتيجي طبيعيا بعد وجود رغبة من الطرفين.💟

**في علامات بتحصل طبيعيا للرجل والسيدة بتدل على حدوث الاثارة،  و اهم علاماتها فى الرجل هى الانتصاب  erection  و فى السيدات اهم علاماتها الافرازات المهبليه و انتصاب البذر clitorial tumesence  و انتفاخ فى الشفرتين و انتصاب فى الحلمتين nipple erection .

**عند البعض ممكن يحصل اضطرابات في المرحلة دي تؤدي الى عدم حدوث العلامات الدالة على الاثارة.😣

*طبعا الاضطرابات ممكن تحصل للرجل او السيدة.👍

**الاضطرابات اللي بتحصل عند الرجال ممكن تكون :

1. عدم القدره على الانتصاب erectile dysfunction

2. سرعه القذف premature ejacultion 

*اما فى السيدات فالاضطرابات فى المرحلة دى بتكون في صورة جفاف منطقة المهبل وعدم ظهور باقي العلامات التانية اللي شرحتها عند الحالات الطبيعية..🌷

*انهاردة حنتكلم بس عند الاضطرابات عند الرجال، وحخلي الاضطرابات عند السيدات في بوست لوحده عشان محتاج شرح كتير.💞

*حنتكلم عن الاضطرابات فى المرحله دى عند الذكور

1-عدم القدرة على الانتصاب erectile dysfunction  (ED ) :

ممكن تحدث عند نسبه من الرجال و طبعا دي بتكون مشكله كبيره ، بتتلخص فى عدم القدرة على الانتصاب اثناء العمليه الجنسية او عدم القدرة على المحافظه على الانتصاب حتى نهايه العمليه.

*اسبابها:
طبعا الاسباب كتيره و تنقسم لاسباب عضويه و دوائيةو اسباب نفسيه( دي بقى بتاعتنا 😀)

1.الاسباب العضويه اهمها مرض السكر و امراض القلب و تصلب الشرايين و امراض البروستاتا و اصابات الحبل الشوكى و  امراض الغده الدرقيه و نقص هرمون التستيرون و  باقى الامراض المزمنه مثل امراض الكبد و الكلى.🌷🌷

2.الاسباب الدوائية  بتكون ناتجة عن استخدام بعض الادويه مثل :
#.مثبطات مستقبلات بيتا beta blockers المستخدمه فى علاج ارتفاع ضغط الدم.💟
#.بعض الادويه المستخدمه فى علاج الامراض النفسية زي مضادات الاكتئاب المثبطه لامتصاص السيرتونين SSRIs  و مضادات الذهان  antipsychotics.💟

3.الاسباب النفسيه:  و اهمها مرض الاكتئاب و أمراض القلق و مرضى الفصام.💟

**في حاجة مهمة هنا لازم تعرفوها: ان بعض الرجال في اول ايام الزواج ممكن يحصلهم فشل في الانتصاب بسبب نوع من التوتر اسمه performance anxiety🙈🙈 يعني يبقى الزوج محرج من مراته وخايف انها تحكم عليه غلط. ودي مش بتطول طبعا، لما بياخدوا على بعض الامور بترجع طبيعية. فاكرين فيلم ليلة سقوط بغداد 😀 فعلا اللي قاله احمد عيد كان صحيح وان نسبة كبيرة بيحصلها كدة فعلا في اول الزواج 😀😀😀

*العلاج:

1.طبعا اولا علاج السبب لان طول السبب ماهو موجود المريض مش حينحسن و مع علاج السبب بيتحسن المريض.🌷
#زي مثلا لو بياخود دوا معين هو السبب في الاضطراب يبقى نبدله بدوا تاني.
#لو السبب نفسي لازم المريض مايترددش انه يروح لطبيب نفسي.

2.تانى حاجة الادويه :
اشهرها طبعا عقار seldinafil(VIAGRA )
و طبعا لازم يكون تحت اشراف طبيب متخصص و ممنوع تماما لمرض القلب استخدامه، بس للاسف الناس بتسيء استخدامه واي حد بيروح ياخده من الصيدلية.  😯

3.الاجهزه التعويضيه :
و دى بتستخدم فى حاله عدم الاستجابة للادويه او يكون في الاسباب غير قابله للعلاج زي الامراض المزمنة. 🌷

*ايه هي الاجهزة دي:
ببساطة هى عباره عن انبوبه  قابله للثنى بتتركب فى القضيب و يمكن نفخها بمضخه معينه يدويا حتى تتم عمليه الانتصاب..

*كدة خلصنا اول اضطراب ممكن يحدث للرجل، نيجي بقى للاضطراب التاني:

**الاضطراب الثانى لدى الذكور هو سرعه القذف premature ejacultion

للاسف دى مشكله منتشره بصوره مش قليلة بين الرجال تصل الى اكتر من 30% .😦

المشكله بتتلخص ان الرجل لايستطيع التحكم فى عمليه القذف فبتم بسرعه جدا بيحث ان لايتم الاشباع لكلا الطرفين فى العلاقه.

دا طبعا بيترتب عليه مشاكل لكلا الطرفين..😢

بالنسبه للرجل بيكون عدم الاشباع الجنسى و عدم الاستمتاع بالعلاقه. 

اما الزوجه بتكون هى اكثر تضررا عشان بيحصل احتقان متكرر فى منطقه المهبل و باقى الاعضاء التناسلية و دا بيسبب الام مزمنه فى اسفل البطن pelvic pains بالاضافه الى عدم الاستمتاع بالعلاقه الجنسيه ككل وممكن بعد كدة الزوجة تنفر من العلاقة.

**طبعا برده اسباب سرعه القذف متعدده و منها:

1.اسباب عضويه تتشابه مع اسباب عدم القدره على الانتصاب.

2.اسباب نفسيه: ودي بقى في الغالب بتكون هي سبب المشكلة ،، 

**العلاج:
بما ان المشكلة دي بالذات سببها نفسي، فاعلاجها بيبقى عندنا،، يعني عند الطبيب النفسي😉 🌷🌷

1.اول حاجة برده علاج السبب.

2. استخدام بعض الطرق اثناء العلاقة، ودي طبعا محتاجه تفهم من الطرف التانى اللي هو الزوجه يعنى و انها تساعد الرجل حتى العلاج.

ايه هي الطرق دي :
▪ start and stop method:
دى ببساطة لما يشعر الرجل انه على وشك الانزال عند النقطه دى يتوقف تماما حتى يهدأ و يرجع من جديد ووهكذا تتكرر العمليه عده مرات و بعد فتره الامور حتتحسن.

▪ masters and Johnson technique:
ودى الزوجه بتلعب دور كبير فيها، ازاي ! لما الزوج بيشعر انه على وشك الانزال الزوجه تمسك القضيب من تحت الرأس glans بشكل دائرى مع الضغط عليه بشده لغايه الزوج ما يهدأ و الرغبه فى  الانزال تقل و بردوا تتكرر العمليه بصوره دوريه حتى تتحسن الحاله.

وعشان تتخيلوا اكتر ممكن تدخلوا على جوجل وتكتبوا اسم الحاجات دي حتلاقوا صور كرتونية موضحة الطريقة ببساطة.

**اثناء الطرق السابقه الزوج برضه يحاول انه يفكر فى شئ بعيد عن العمليه الجنسيه، زي مثلا يفكر حنتغدى ايه بكرة 😀😀😀

3.العلاج الدوائى:
طبعا بيكون تحت اشراف الطبيب النفسى و دى
 ادويه بتستخدم غالبا لعلاج القلق و الاكتئاب و بنستفيد من الاعراض الجانبيه للدوة فى علاج سرعه القذف، لانه المعروف ان الادوية دي بتأخر الوصول للنشوة orgasm

عشان كدة لو رجل طبيعي ماعندهوش سرعة قذف  اخد الادوية دي، حيتأخر عنده القذف جدا وفي بعض الحالات ممكن مايحصلش قذف.

▪اشهرها دواء Anfranil  و ادويه SSRIs
ومن الاخطاء الشائعه فى استخدام الادويه ان الناس بتستخدمها قبل الجماع بنص ساعه وخلاص ودا مش بيجيب نتيجه لان الادويه دى محتاجه استخدام مستمر حتى تتحسن الحاله،، ده غير كمان انه عدم الاستمرار على الادوية دي بالذات حتخليه كل ماياخودها يتعب من اعراضها الجانبية التانية زي الغثيان، فا ممكن يكره العلاقة ايضا.

▪ عقار الدوبكستين dopoxitine
دا دوا جديد نزل السوق المصرى من ثلاث سنين و دا يمكن استخدامه قبل الجماع بفتره بسيطه و عند الحاجة لكن برضه لازم يكون تحت اشراف طبيب نفسى متخصص . 🌷🌷🌷

يارب يكون الموضوع عجبكم واستفدتم منه،، المرة الجاية حتكلم عن الاضطراب عند السيدات.💟💟💟

د. سالي فتحي،، اخصائية الطب النفسي وعلاج الادمان.
جروب الفيس بوك
Beauty secrets with dr. Sally Fathy
لينك الجروب
https://m.facebook.com/groups/1743509399258731?ref=m_notif&notif_t=like

علاج اثار حب الشباب

ده البوست التانى لعلاج اثار حب الشباب
حب الشباب بعد علاجه ممكن يختفى تماما بدون اثر و ده السيناريو اللى بنتمناه مع العلاج والتعليمات اللى قولناها .
لكن فى بعض الاحيان يترك اثر فى الوجه او الاماكن الاخرى اللى بيظهر فيها زى الظهر والصدر واعلى الذراعين.
اثار حب الشباب ممكن تكون حاجة من الاتى :
* بقع غامقه مكان الحبوب
*  ندبات بارزة keloid
*  ندبات ناتجه عن ضمور بالجلد atrophic scars
و دى بتاخد أشكال كتير مش مجال ذكرها او التفرقة بينها.
طيب اولا ازاى نمنع ظهور هذه الاثار :
* ممنوع منعا باتا اللعب فى الحبوب او محاولة تفريغها لان ده بيزود الالتهاب جدا.
*  سرعة تشخيص وعلاج الموضوع من اوله
* لازم نستخدم واقى شمس عشان الالتهابات دى مع الشمس بتعمل بقع .... طيب سؤال هوا مش ممكن واقى الشمس يزود الحبوب .. اه طبعا عشان كده لازم نستخدم نوع مخصوص للبشرة الدهنية زى ايه
Anthelios xl spf 50+ gel cream
* احيانا بيكون تكوين الندبات فى حب الشباب وراثى حتى لو حب الشباب بسيط
* بعض دهانات حب الشباب ممنوع استخدامها فى الضوء او صباحا ولازم تستخدم قبل النوم زى marpalene و اخواته. لو العيان استخدمها بالنهار وشه بيبقع ويلتهب .
طيب ازاى نعالج الاثار دى ؟؟
فى حلول كتير ولازم الطبيب يختار انسبها لكل حالة او يجمع بين طريقتين او اكتر منهم:
* التقشير الكيميائى
* الديرما رولر  dermaroller  و دى عباره عن اداه دوارة فيها سنون رفيعة جدا باطوال مختلفة منها اللى ممكن تستخدميه بنفسك فى البيت ومنها اطوال لازم الطبيب يعملها بنفسه. ودى بتحفز الكولاجين وتحسن شكل الندبات
* جلسات الليزر و دى بتكون فعالة فى معظم انواع الندبات واشهرهم
*  fractional co2 laser or
*  fractional erbium
وعادة بتحتاج من 3 ل 5 جلسات .
* ديرمابن  dermapen
و ده جهاز فكرته شبه الصنفرة بتاعة زمان ولكن بطريقة automated  ومعاه سنون بتجمع بين فكرة الصنفرة والديرما رولر
*الوميض الضوئى او Ipl
و ده ليه دور فى علاج الحبوب النشطة وكمان فى علاج بعض الندبات السطحية
*حالات الندبات البارزة keloid  ممكن نعالجها بحقن الكورتيزون .
*حقن الفيلر  من الحاجات اللى بتعالج مؤقتا ندبات حب الشباب وبنعمل معاها حاجة تانية اسمها subcision 
*حقن البلازما او PRP  وده ممكن يتعمل مع الديرمارولر او ديرمابن او بالتبادل مع الليزر وبتحسن الندبات وده لوجود عوامل نمو فى البلازما الغنية بالصفائح الدموية.
وبكده نكون غطينا معظم العلاجات ويارب تكونوا استفادتم .... إلى لقاء

د. السيدة طه ، مدرس مساعد امراض الجلدية والتناسلية والتجميل، كلية الطب ، جامعة الاسكندرية.

***جروب الفيس بوك 
Beauty secrets with dr. Sally Fathy

لينك الجروب :

https://m.facebook.com/groups/1743509399258731?ref=m_notif&notif_t=like

علاج حب الشباب

نيجى لبوست العلاج .
اولا: حب الشباب :
علاجه ينقسم لجزئين الاولى هيا علاج حب الشباب نفسه وللتانيه هيا علاج اثار حب الشباب من بقع او ندبات
قبل ما اتكلم عن الحلول المتاحة سواء للعلاج او الاثار عاوزة انبه لحاجة مهمة جدا ...... مش انتى اللى حتقررى انك تبدئى العلاج مع نفسك ولا انتى اللى حتختارى نوعه ولا امتى يقف لاننا قدام ادوية ليها اعراض جانبيه وتفاعلات مع ادوية اخرى وده دور الطبيب المعالج .
طيب ليه بنعرفها عشان الهدف من البوست ده انى ازود وعيك بطبيعة المشكلة وسبل علاجها . واهم حاجة عندى انك تعرفى ان حب الشباب ليس مرض وانما هو عرض من اعراض فترة البلوغ والتغيرات الهرمونيه المصاحبة ليها والهدف الاساسى من العلاج اننا نقلل زيادته ونمنع حدوث مضاعفات زى الندبات الدائمة ......
1.التعليمات اللى قولنا عليها فى بوست الأسباب ممهمة جدا زى عدم اللعب فى الحبوب وتجنب تضييق الطرحة على الوش والاكل والبعد عن الفتلة .......الخ
2.  مضادات حيوية موضعيه سواء كريم او لوشن زى
Aknemycin cream and lotion
Clindasol
3. مضادات للالتهاب موضعية زى
Akneroxide cream
Panoxyl cream
3. كريمات للتقشير وفتح مسام الجلد زى
Marpalene cream
Adapalene gel
Palmash cream
Acretein 0.025 _0.05
Acnetin .....etc
Azaderm cream
Skinoren cream
4. مضاد حيوى اقراص او كبسولات و ده بنحتاجه فى الحالات المتوسطة وبنستخدمه دايما بجرعة صغيره ولكن لفترات طويلة قد تصل لشهور زى
Doxy mr  100mg
Vibramycin 100,mg
Doxycost 200 mg
5. غسول الوجه او الصابون الطبى وده دوره بيكون تقليل دهنية للبشره زى
Teenderm
Malinda AHA cleanser
Synobar
Akren cleanser
  Tritect acne soap
5. فى بعض الدهانات الموضعية بتقلل دهنيه البشره
Sebopure gel
Sebium AKN
6.  الحالات الشديده او المستعصية نلجأ فيها   ل
Netlook
Roaccutane
Isotretinoin
الادوية دى محتاجة تحاليل قبل واثناء العلاج
ممنوع نهائيا للحوامل او المتزوجات ولا يستخدمن وسيلة منع حمل لانها قد تحدث تشوهات بالجنين
ممنوع نهائى تاخديها من نفسك بدون متابعة طبيب ..... انا ذكرتها بس عشان انبه على كده لانى بشوف بنات سمعوا اسمها من صاحباهم وعاوزين ياخدوها مع نفسهم .

د. السيدة طه ، مدرس مساعد امراض الجلدية والتناسلية والتجميل، كلية الطب ، جامعة الاسكندرية.

***جروب الفيس بوك 
Beauty secrets with dr. Sally Fathy

لينك الجروب :

https://m.facebook.com/groups/1743509399258731?ref=m_notif&notif_t=like

البشرة الدهنية و حب الشباب

السلام عليكم ،
البشرة الدهنية ومشاكلها هما موضوعنا النهارده.
و زى ما اتعودنا دايما بنتكلم عن الاسباب عشان نفهم الموضوع قبل ما نعرف حنعالجه ازاى.
البشرة الدهنيه( واللى بتكون مرتبطة بظهور حب الشباب والاكزيما الدهنيه) دايما بتبدأ تظهر عند بداية البلوغ و ده لانها مرتبطة بهرمونات الذكورة. بالمناسبة النساء كمان عندهم هرمونات الذكورة ولكن بنسب اقل من الرجال.
البشرة الدهنيه فى حد ذاتها مشكلة بتضايق جدا لانها بتدى مظهر لامع للوجه و ده جماليا غير مقبول ده غير ما يترتب عليها من ظهور لحب الشباب او اكزيما دهنيه.
****بالنسبة لحب الشباب:
ده اول واهم سبب بيلعب دور فى ظهور حب الشباب وفى عوامل تانية مش عاوزة ادخل فى تفاصيلها عشان ما اتوهكمش بس تعرف منها ان الفتحة اللى بيخرج منها السائل الدهنى (اللى هيا نفسها فتحة الشعر ) بتبدأ تتسد و دى بداية تكون الروؤس السودا والبيضاء والحبوب الملتهبة.
طيب دى العوامل الهرمونيه ... يا ترى فى عوامل تانية ؟؟؟
اه بس تعتبر عوامل مساعده يعنى بتزود حدوث حب الشباب وتزود شدته فى الناس المعرضين للاصابه به .
زى ايه ؟؟؟
1. الاكل
علاقة حب الشباب بالاكل اصبحت علاقة مؤكده ومثبته علميا. طيب ايه الاكلات دى ؟؟
* اللبن ومنتجاته
* المكسرات
* الاكل اللى سعراته الحرارية عاليه ... زى الوجبات السريعة و السكريات والدهون
* الشوكولاته ....للاسف
*  الموالح والمخللات
طيب نمنع الاكل ده نهائى... ياريت ..لكن بخصوص الالبان نحاول نقلل قدر الامكان
2. الضغط النفسي
بنلاحظ دايما زياده حب الشباب فى اوقات التوتر والقلق والامتحانات
3. اللعب فى الحبوب
دى كارثة لوحدها ... مش بس بتزود الحبوب والالتهاب . لأ دى بتسبب حدوث بقع و ندبات بتبوظ شكل الوش تماما وعلاجها بيكون صعب وبيطول.
4. الادوية .
بعض الادوية بتزود حب الشباب زى حبوب منع الحمل والكورتيزون وبعض ادوية الاكتئاب.
5. طبيعة العمل .
الناس اللى بتتعرض للزيوت والشحوم فى شغلهم بيكونوا عرضة لانواع معينة من حب الشباب.
6. الاحتكاك.
كتير بنلاحظ ظهور حب الشباب فى اماكن الاحتكاك مع حرف الطرحة لو كان حجاب ضيق ع الوش .. او على الجبهة مكان الاحتكاك مع الخوذة او رباط الرأس فى الرياضيبن.
7. زيوت و دهانات الشعر
بعض البنات اللى بتدهن شعرها زيت بنلاقى عندها حب شباب فى الجبهة وممكن الخدود تكون خالية من الحبوب تماما....
8. الميك اب وخصوصا كريمات الاساس والبودرة المائية والماسكات... كل دى حاجات بتسد مسام البشرة وتزود حب الشباب
9. ازاله شعر الوجه او الظهر بالفتله او الواكس. ممنوع نهائيا لاى حد بيعانى من مشكلة حب الشباب.

*****الاكزيما الدهنيه :
دى تانى مشكلة ممكن تحصل ودى بتكون عبارة عن ظهور احمرار وحكه مصاحب ليها وجود قشور صفرا دهنيه فى اماكن معينة زى الحواجب والرموش وفروة الراس والوجه خصوصا فى المنطقة حوالين الأنف.
الالتهابات دى بتكون للاسف مزمنه ومتكررة وبتزيد مع زياده النشاط الدهنى للبشره زى فى اوقات الصيف والحر.
خدوا بالكم ان قشر الشعر يعتبر جزء من المشكلة دى وده غالبا بيظهر فى الشتا ويقل فى الصيف .

د. السيدة طه ، مدرس مساعد امراض الجلدية والتناسلية والتجميل، كلية الطب ، جامعة الاسكندرية.

***جروب الفيس بوك
Beauty secrets with dr. Sally Fathy

لينك الجروب :

https://m.facebook.com/groups/1743509399258731?ref=m_notif&notif_t=like

طريقة تجفيف المانيكير بسرعة

مشكلة المانيكير مشكلة مزعجة، لان طبيعي اي واحدة تتضايق بعد ماتتعب في اللون اللي عملته وفي الاخر بمجرد ماتلمس اي حاجة الشكل يبوظ ويبقى معضعض 😢😢😢

**طبعا كلنا جربنا حكاية انك تحطي ايدك في ماية ساقعة او تحطي ازازة المانيكير في التلاجة قبل ماتستخدميها، بس طبعا كل دي طرق فاشلة، لانك محتاجة تسيبي ايدك في الماية مثلا نص ساعة عشان ينشف 😀 وطبعا موضوع التلاجة ده فاشل برضه.

** الحل بمنتهى السهولة ولا محتاج ماية ولا تلاجة 😀 وتقدري تستخدمي ايدك في نفس اللحظة عادي جدا وتمسكي اي حاجة براحتك خالص،،  بس طبعا مش تروحي تفتحي علبة تونة بضوافرك 😂😂

**من كتر عشقي للمانيكير 💟 فكرت ودورت كتير عن ازاي اخليه ينشف، والحمد لله  الموضوع ده انا بعمله من زمان وحبيت اني افيدكم معايا ، بس تدعولي 😙  طب ايه الحل السحري بقى ! 😉

** بصي ياستي، بمنتهي البساطة بعد ماتحطي المانيكير تجيبي اي زيت عندك، ان شالله زيت الدرة اللي بتطبخي بيه وتحطي بالراحة على كل ضوفر وتفرشيه بالراحة على الضوفر كله، او تحطي حبة في فنجان وحوطي ضوافرك فيه، طبعا كل ضوفر لوحده ماتحطيش ايدك كلها في الفنجان عشان ماتبوظيهوش، انتي مش محتاجة تسيبي ضوافرك في الفنجان خاااالص، مجرد بلة وتشيليه في لحظتها. ومش حتصدقي، خلاص كدة المانيكير نشف واعملي اللي انتي عايزاه 😙😙😙😙

**انا بستخدم cuticle oil اللي اتكلمت عنه في بوست العناية بالاظافر، عشان اضرب عصفورين بحجر، ابقى نشفت المانيكير وفي نفس الوقت غذيت ضوافري.

** الفكرة ان الضوفر حيبقى مزيت وبالتالي مش حيلزق في اي حاجة ولا حيعلم في اي حاجة تلمسيها، لان طبقة الزيت حامياه. 💞💞💞

** ودي صورة ضوافري، حطيت المانيكير وكتبت البوست بعدها على طول، عادي جدا ولا باظ ولا حاجة 💟

** ودي صورة 

cuticle oil

  عشان افكركم بيه 

 اعملوا شير للبوست يابنات عشان الكل يستفاد.

د.سالي فتحي ، اخصائية الطب النفسي وعلاج الادمان.

جروب الفيس بوك

Beauty secrets with dr. Sally Fathy

لينك الجروب :

https://m.facebook.com/groups/1743509399258731?ref=m_notif&notif_t=like

العناية بشعر الاطفال

موضوع العناية بشعر الاطفال سهل وبسيط المهم انك تعرفي ايه الصح للطفل وايه اللي يفيده وايه يضره.💟

*اولا قبل مانعرف نعتني بشعر الطفل ازاي لازم نعرف ايه الحاجات اللي لازم نتجنبها الاول:

1. ممنوع نهائي عمل اي فرد للاطفال، سواء بروتين او غيره.
2.يفضل عدم استخدام شامبوو الكبار لانه فيه مواد كيماوية وممكن انها تؤذي شعر الطفل.
3.تخصيص فرشاة للطفل لوحده وعدم مشاركته فيها.

4.للأسف بشوف بنات كتير بيصعبوا عليا من طريقة تسريحة شعرهم، 😢 بيبقى مشدود بطريقة غريبة ، او مليان توك (بوكلات) كأنه معرض مش شعر طفلة 😯، وفي الاخر الامهات تعيط وتقول شعر بنتي خفيف وبيوقع 😣، طبعا انا عارفة ان بعض الامهات بتضطر لكدة عشان شعر بناتهم جاف وبيهيش، بس اوعدك لو عملتي بنصايحي مش حتضطري لكدة تاني. 🌷

* نيجي بقى للمهم😉
1. غسيل الشعر:
نصيحة بلاش شامبوو جونسون لانه بينشف الشعر جدا.
انا انصح بشامبوو هيمالا للاطفال، رائع وريحته تجنن وبينعم ،،، وعلى فكرة انتي كمان ممكن تستخدميه عادي💟

2.الترطيب:

*للاطفال من سن يوم ل 4 سنين:

بعد غسل الشعر بالشامبوو انتي مش محتاجة غير زيت جونسون للاطفال، لانه خفيف ومناسب لفروة الاطفال في السن ده،،، بلاش المبالغة في استخدام الزيوت التقيلة او الكريمات في السن ده.

الزيت ده رائع للسن ده، بيطري وبينعم وحتلاقي الشعر مش بيهيش ابدا،، تقدري تدهني منه كل يوم عادي.

طبعا الازازة فاضية لاني بستخدمه كتير ليا انا كمان، 😀 بعدين اقولوكم بعمل بيه ايه 😉

*بعد سن 4 سنين:

تقدري تستمري على زيت جونسون عادي، لكن لو حاسة ان الشعر ناشف اوي ومحتاج حاجة اقوي يبقى تستخدمي

بالمرز بجوز الهند، دهان يومي للتسريح،، طبعا رائع ومغذي ومفيد للشعر جدا.

*حمام الزيت:

ابتداءا من سن 6 سنين تقدري تستخدمي حمامات زيت لشعر بنتك قبل غسيل الشعر بالشامبوو.

على حسب درجة جفاف الشعر، لو عادي اعمل الحمام مرة اسبوعيا، لكن لو جاف جدا يبقى خليه مرتين.

حتعملي الحمام بزيت جونسون بالصبار مع زيت اللوز وزيت حبة البركة وزيت خروع ،تدهني الفروة والشعر كويس وتسيبيه مش اقل من ساعتين، ويستحسن اكتر.

خليط الزيوت دي مناسبة لعمر الطفل في السن ده ومفيدة جدا جدا.

لما تغسلي الشعر بعد حمام الزيت تغسيليه مرتين بس بالشامبوو مش تفضلي تغسلي لحد ماتشيلي كل اللي عملناه 😊

ودي صورة زيت جونسون الصبار اللي اقصده

3. الاهتمام بالتغذية السليمة:

طبعا لو في انيميا لازم تتعالج لانها من اهم اسباب سقوط الشعر.

تهتمي بالسوايل والماية للطفل جدا، الاطفال حركتهم كتير وبيفقدوا سوايل بسرعة، عشان كدة لازم يشربوا كتير.

يفضل من فترة لاخرى تدي للطفل فيتامينات 

Multivitamins

 حتلاقي انواع كتير في الصيدليات، هاتي اي نوع.

4.

لو فيه تساقط في الشعر كتير (طبعا بعد مانكون عالجنا الانيميا)ممكن تستخدمي دهان كامينوموتو تونيك، مناسب للاطفال وبيحفز نمو الشعر

ولو عايزة حاجة ارخص شوية يبقى لوشن سورسير بالتوم، حلو جدا وبيطول كمان

*** ولكل البنات اللي ماشافوش كل بوستاتي احب اقولكم اني عملت من فترة بوست عن العناية بالشعر للكبار، تقدروا تلاقوه في اللينك ده

http://sallywithlove.blogspot.com/2016/07/blog-post_19.html

د.سالي فتحي، اخصائية الطب النفسي وعلاج الادمان.

جروب الفيس بوك 

Beauty secrets with dr. Sally Fathy

للانضمام للجروب يرجى الذهاب لهذا اللينك

https://goo.gl/qSW2px