تفتيح المناطق الغامقة بالجسم 2

*المرة دي حتكلم عن اسباب وعلاج سواد الكوع والركبة،، هما عشان اسبابهم مختلفة شوية حبيت اني اتكلم عنهم لوحدهم 🌷🌷🌷
*طبيعي ان جلد الكوع والركبة يكون اسمك شوية من باقي الجسم ، لكن مش طبيعي انه يكون اغمق 😦 ، ده بيبقى بسبب سوء التعامل معهم او بسبب قلة الاهتمام بيهم ، زي ماحوضحلكم 🌷

*طيب ايه الاسباب :
1.كثرة السند على الكوع اثناء الجلوس، سواء على المكتب او في اي وضع اخر

2. قلة ترطيبهم: طبيعي لان الجلد عليهم اسمك شوية انه يحتاج ترطيب اكتر.

3. عدم الانتظام في استخدام السكرب: طبعا لازم نركز على الكوع والركبة اثناء التقشير بالسكرب.

4. بالنسبة للون الغامق للركبة : كثرة الجلوس على الركب طبعا من اهم الاسباب، مع باقي الاسباب اللي قولتها.

*في حاحة مهمة لازم تعرفوها: ان المبالغة في تقشير الاماكن دي بأدوات غلط حيسبب نتيجة عكسية ، ازاي !😯

في ناس بتستخدم الحجر الحفاف لدعك الركب والكوع 😯😯😯، طبعا دي أذية ما بعدها اذية، واوعوا تفتكروا انكم كدة بتسرعوا التحسن، بالعكس الدنيا حتبوظ زيادة.

*نيجي للعلاج: 💟💟

طبعا اول خطوات العلاج اننا نتجنب الاسباب اصلا، ازاي:

1.عدم السند على الكوع اثناء الجلوس

2.عدم الوقوف على الركب ابدا حتى لو على خامة قطنية .

3.استخدام التقشير بالسكرب مرتين اسبوعيا ، زي ماوضحت في البوست اللي فات.

4.الاهتمام بترطيب الكوع والركب يوميا وبمرطب قوي، زي الفازلين

5. نيجي بقى للوصفة السحرية: طبعا الوصفات كتير لتفتيح الاماكن دي، بس انا حقولكم اسهلهم واكترهم نتيجة، ده طبعا عشان الكسلانين 😊😊

حتقسمي ليمونة نصفين وتعصريهم شوية، حتدعكي الكوع والركب كويس اوي بالليمون، كل يوم بالليل قبل ماتنامي، وماتغسليش، نامي عادي والصبح اشطفي بماية دافية ورطبيهم كويس ، وادعيلي 😉

انا بس عايزة اوضحلكم حاجة مهمة، ان كل ده كلام علمي وموثوق 100% وعلى مسئوليتي، وطالع من دكتورة دارسة وقارية، يعني مش وصفة بلدي مثلا و تأليف ولا ببيع كلام،، لاني زعلت جدا جدا البوست اللي فات لما الاقي واحدة كاتبة كومنت للناس بتسألهم حد جرب الكلام ده وجاب نتيجة !😦 

ان شاء الله البوست يعجبكم 💟💟

د.سالي فتحي، اخصائية الطب النفسي وعلاج الادمان

جروب الفيس بوك :

Beauty secrets with dr. Sally Fathy

https://m.facebook.com/groups/1743509399258731?ref=m_notif&notif_t=like