اهمية شرب الماء

بوست انهاردة حكلمك فيه عن سر من اسرار الشباب والحياة الصحية  

،،،، 💞 طبعا الماية.

*للأسف اغلبنا مهمل جدا في شرب الماية، مع انها هي مفتاح الجسم السليم والعقل الصافي.🌷

*طيب، ليه لازم نشرب ماية! ومش نشرب وخلاص، لا لازم نشرب كتير بجد.
*طبعا في الاول حتلاقي نفسك بتنسي لكن مجرد ماتعودي نفسك على العادة دي حتلاقيها بتحصل من غير ماتفكري،،، فاكرين لما كلمتكم في بوست اسرار الجمال وانك لازم طول الوقت تشفطي بطنك،، قولتلكم في الاول حتنسي وحتحسيها صعبة، لكن بالتعود حتلاقي نفسك بتعمليها من غير ماتحسي طول الوقت💟

*لازم تعرفوا الاول اننا طول الوقت بنفقد ماية، وطبعا الفقد بيبقى اكتر في البلاد اللي جوها دافي وحار، زي بلادنا الجميلة 😊 ازاي! هي مش بنفقدها عن طريق التبول بس ؟ لا طبعا،،، ايوة بنفقد ماية عن طريق التبول، وكمان عن طريق العرق ( حتى لو مش بتعرقي الماية بتتبخر من سطح الجلد)، التنفس، و التبرز
*لو كمية الماية اللي بيفقدها جسمك اكتر من اللي بتستهلكيها حيحصلك جفاف، 😢 طيب ده ايه اعراضه؟ 
1.كسل وخمول
2.جفاف الجلد
3.سهولة تكوين حصوات بالكلى
4.امساك
5.وطبعا ظهور التجاعيد والخطوط الرفيعة اللي حتديكي سن اكبر من سنك 😯

*نيجي بقى لفوايد شرب الماية كتير 👍:
1. مهم انكم تعرفوا ان جسمنا بيتكون من ماية بنسبة اكتر من 60%،،، ودي مهمة لعملية الهضم، الامتصاص، الحفاظ على الدورة الدموية، الحفاظ على درجة حرارة الجسم، و نقل المواد الغذائية لجميع اعضاء الجسم.
2.التحكم في السعرات الحرارية : طبعا الماية مافهاش ولا سعر حراري،، عشان كدة مهما تشربي ماية مش حتتخني، بالعكس، كتر شرب الماية بيساعد على التخسيس،، لانه بيزود معدل حرق الجسم، وبتخلي الجسم يتخلص من السوائل المحتبسة، وكمان بتديكي احساس بالشبع ( ده طبعا لو بتشربي كتير).
*عشان كدة عودي نفسك قبل اي وجبة او اي سناك ، ان شالله لو حتاكلي بسكوتة ، اشربي كوباية ماية.
3.النشاط الدائم: عضلات جسمك محتاجة لماية عشان تقدر تشتغل كويس، لو انتي مش بتديها الماية الكافية حتضعف وحتلاقي نفسك كسلانة وبتتعبي من اقل مجهود.😢
*عشان كدة مهم جدا جدا انك تشربي ماية كويس جدا قبل ماتلعبي رياضة بساعتين، واثناء الرياضة برضه لازم تشربي بإنتظام عشان تعوضي السوايل اللي بتفقديها مع العرق.
4.الحفاظ على بشرة شابة: طبعا المرطبات والكريمات اللي اتكلمنا عنها، في بوست العناية بالبشرة، مهمة جدا،، لكن طبعا لو انتي مش بتشربي ماية كتير حتبقى زي قلتها، لان جلدك حيبقى على طول جاف(طبعا حتى لو بشرتك دهنية)  وطبعا ده حيسبب ظهور التجاعيد،، عشان كدة عودي نفسك برضه قبل ماتحطي اي كريم اشربي ماية، عشان ماتنسيش. 🌷
5. الماية بتساعد الكلى على التخلص من سموم الجسم، وكمان عدم تكون الحصوات.💟
*لو انتي البول بتاعك ليه ريحة ولونه غامق على طول، اعرفي انك ظالمة نفسك 😢
*لكن لو لونه على طول فاتح ومالهوش ريحة، اعرفي انك كدة 👍👍👍.
6.الحماية من الامساك: طبعا كثرة شرب الماية بتسهل حركة الاكل في الامعاء وبتحمي من الامساك،، لكن لو انتي مش بتشربي ماية كتير جسمك حيحاول انه يمتص الماية اللي موجودة في البراز وبالتالي حيسبب امساك 😣😣

*ازاي بقى ماننساش نشرب ماية كتير !
1.تحطي ازازة ماية في شنطتك،،، في عربيتك، وعلى مكتبك،، وجنب سريرك عشان تشربي اول ماتقومي من النوم وقبل ماتنامي.
2.تاكل خضروات وفواكه كتير لان فيها نسبة ماية عالية.
3.تشربي ماية قبل اي حاجة حتدخل من بوءك الجميل ده 😘😘😘
4.كمان تكتري من المشروبات والعصايراللي بتحبيها، بس خودي بالك من السعرات الحرارية 😉.

*لازم تعرفوا ان مع تقدم العمر الاحساس بالعطش بيضعف جدا، عشان كدة لازم تخلوا ازازة ماية مليانة على طول جنب كبار السن وتخلوهم يشربوا كتير. 🌷🌷🌷

*واعي تنسي ان الماء اصل الحياة،، وزي الزرعة اللي مش بترويها كويس بتنشف وتموت بسرعة،،، جسم الانسان برضه بيحصله نفس الشيء.🌷🌷🌷

*يارب تكونوا استفادتوا من الموضوع، ويساعدكم فعلا انكم تعملوا حاجة مهمة جدا في حياتنا وهي شرب الماية كتيييييييير 💞💞💞

*ياريت تعملوا share للموضوع، لانه مهم جدا واتمنى يوصل لكل الناس.💟

د سالي فتحي،، اخصائية الطب النفسي وعلاج الادمان.
جروب الفيس بوك: 
Beauty secrets with dr. Sally Fathy

https://m.facebook.com/groups/1743509399258731?ref=m_notif&notif_t=like