تفتيح المناطق الغامقة بالجسم

*موضوع انهاردة اتطلب مني كتير جدا، وانا وعدت كل اللي طلبه اني حعمل بوست عنه، والحمد لله انهاردة بوفي بوعدي اهو😘😘

*مشكلة الاماكن الغامقة طبعا بتضايق كل بنت، طبعا اقصد منطقة البيكيني وبين الافخاد والإبط واحيانا الرقبة عند البعض ، وأكيد كل واحدة نفسها ان لون جسمها يبقى كله واحد 🌷
*لازم نعرف الاول ايه سبب المشكلة دي، وازاي نعالجها ، وازاي نمنع حدوثها تاني.

*طبيعي ان المناطق دي بتكون اغمق شوية من لون الجلد، لكن الاسمرار الشديد ده بيكون ليه اسباب :
1. السمنة
2.كثرة العرق
3.كثرة الاحتكاك
4.استخدام كريمات ازالة الشعر
5.عدم الاهتمام بنضافة الاماكن الحساسة.

*ايا كان السبب فالحمد لله الحل موجود.

*اولا لازم نمنع الاسباب عشان الموضوع مايحصلش تاني، ازاي:

1. لو انتي تخينة خسي( طبعا كبري ولا كأنك قريتي حاجة 😀😀)
2.لازم لازم تمنعي الاحتكاك، يعني لو افخادك مليانة وملتصقة فالازم تلبس شورت قطن،، لان كل ما الافخاد حتحتك ببعض كل ما السواد حيزيد
ونفس الحال بالنسبة للابط، خصوصا في البنات المليانة، لازم تلبسي حاجة قطن من تحت تحمي الابط من الاحتكاك.
3.بالنسبة للبانتي لازم يبقى قطن عشان يمتص العرق، لان الخامات التانية زي النايلون حتحبسه وده طبعا حيزود السواد.
4.ممنوع استخدام كريم ازالة الشعر او اي لوشن بيزيل الشعر، لانهم من اسباب السواد.
5. الاهتمام بالنضافة الشخصية، يعني يوميا الاماكن دي تتغسل بماية وصابون.

*نيجي بقى للعلاج:
طبعا في كريمات طبية للتفتيح ، بس انا مش بحبها اطلاقا ( مع احترامي لكل حبايبي دكاترة الجلدية 😘😘😘😘)
احنا حنمشي علاجنا كله طبيعي، ونتايجه مزهلة، وكل ده عن تجربة، وحتنسي موضوع السواد ده للابد ( ده طبعا لو عملتي بكلامي 💞💞💞)

1.التقشير scrubing :

طبعا التقشير مهم جدا لانه بيشيل خلايا الجلد الميتة اللي بتسبب اللون الغامق.

مرتين اسبوعيا لازم تستخدمي سكرب لمنطقة البيكيني والإبط، ولو عندك مشكلة في الرقبة كمان اعمليها برضه بس بالراحة.
انا بستخدم سكرب السكر ، لو مش عندك استخدمي بتاع جونسون حلو برضه.
مرتين يعني مرتين، لو قللتي ماتجيش تقوليلي مافيش نتيجة 😯

2.الليمون والخيار :

الخلطة دي حتتعمل يوميا، عصير ليمونة كبيرة او 2 صغيرين مع خيارة واضربي في الخلاط، والخليط ده تدهنيه في  الاماكن الغامقة (طبعا بعد ماتكوني غسلتيها الاول بماية وصابون) وتسيبيه نص ساعة او 45 دقيقة، وبعدين اشطفي 

بماية دافية بس.

طبعا الليمون فيه فيتامين سي وهو مهم جدا للتفتيح ولتجديد خلايا الجلد، والخيار للتلطيف وكمان بيساعد في التفتيح.

ممكن تعملي كمية تكفيكي اسبوع وشيليها في برطمان في التلاجة(عشان الكسلانين بس )  اظن كدة الدنيا سهلة 

🌷🌷🌷

3. Aloe vera gel :

ده برضه دهان يوميا، بعد ماتخلصي خلطة الليمون والخيار وتشطفيها ، تدهني جل الالوفيرا في الاماكن الغامقة،، طبعا حتلاقيه متوفر جدا ، بس ياريت تجيبي اللي نسبة الالوفيرا فيه تكون عالية جدا، اللي في الصورة ده 92% وحتلاقي 100% كمان.

ده بقى تدهنيه وماتشيليهوش.

فايدته انه مرطب وبيفتح في نفس الوقت)يعني ضربنا عصفورين بحجر 😉) 

وماحدش يقولي ان الموضوع صعب، اعمليه كل يوم قبل ماتنامي بنص ساعة، وافتكري انتي حتبقي عاملة ازاي بعد شهر ، وادعيلي 😘

4. بيكربونات الصوديوم (baking soda):

دي حنعملها مرتين في الاسبوع بس، للإبط والرقبة بس، البيكيني لا.

حنخلط 3 اجزاء من البيكينج صودا مع جزء واحد من الماية( يعني مثلا 3 معالق ومعلقة) وتخلطيهم كويس ، حيبقى شبهه المعجون،، حتدهنيه على الإبط او الرقبة وتسيبيه لحد ماينشف (حوالي 20 دقيقة) وتشطفي بماية دافية.

طبعا قبل ماتحطي البيكنج صودا تكوني برضه غسلتي المنطقة كويس بالماية والصابون.

اليوم اللي تستخدمي فيه البيكنج سودا ماتحطيش خلطة الليمون والخيار، دي حتكون بدلها، حتحطي الليمون والخيار في منطقة البيكيني بس اليوم ده.

بعد ماتشطفي البيكنج صودا وتنشفي بالراحة، تبلي قطنة ماية ورد وتمسحي كويس الأبط او الرقبة، معلش ماتتخضيش من اللي حتلاقيه في القطنة 🙈🙈🙈

*الوصفات دي حنستمر عليها فترة لحد مالمكان يفتح، مش طول العمر يعني ، بعد كدة حنستمر بس على السكرب والترطيب بالالوفيرا جل، مع طبعا تجنب الاسباب اللي قولتها في الاول 💞

 انا متأكدة ان البوست حيعجبكم، وحتدعولي لما تعملوا الخطوات دي وتشوفوا النتيجة الرائعة بنفسكم،، 

* ياريت اللي ناوي يلتزم بالتعليمات دي، بعد شهر يقولي ايه الاخبار💟💟

د.سالي فتحي، اخصائية الطب النفسي وعلاج الادمان 

جروب الفيس بوك :

Beauty secrets with dr. Sally Fathy

https://m.facebook.com/groups/1743509399258731?ref=m_notif&notif_t=like