العناية بالاظافر

*الضوافر بتحتاج عناية خاصة عشان تفضل جميلة وصحية، ولو اهملتيها زي شعرك مثلا او بشرتك، حتبوظ وتتكسر بالظبط زي ما الشعر بيتقصف او البشرة بتبقى مش صافية 😦

*في اسباب كتير مننا مايعرفهاش بتساعد ان الضوفر تبوظ ويبقى شكلها سيء ،، عشان كدة اهم خطوة في العلاج اننا نعرف الاول ايه الاسباب اللي بتدمر الضوافر عشان نتجنبها تماما 🌷

1.كثرة التعرض للماء:
اغلب البنات فاكرة ان الصابون بس هو اللي بيؤذي الضوافر، وانهم لو لبسوا جوانتي اثناء غسيل الاطباق يبقى كدة تمام.
طبعا شيء اساسي انك تلبسي جوانتي اثناء غسيل الاطباق، واوعي نهائي تغسلي من غير جوانتي.
بس مش بس الصابون اللي بيؤذي الضوافر، لا الماية كمان كتر التعرض ليها بيضعف الضوافر،، زي مثلا لو انتي من الناس الرايقة اللي بتحب تملى البانيو وتوقعد فيه 😀 ياريت ساعتها تخلي ايدك برة الماية 😀😀.

2.اشربي ماية كتيرررررر:
انا مش عايزاكي تعرضي ضوافرك لماية فترات طويلة، لكن وصلي الماية لضوفر عن طريق الشرب😀
قلة شرب الماية مش بس بيخلي البشرة جافة ، لا كمان بيضعف الضوافر، عشان كدة لو سمحتي اشربي ماية كتييييير.

3.بلاش تطولي ضوافرك زيادة عن اللزوم، لان ده بيضعفها زيادة وبيعرضها بسهولة للكسر، ياريت تخلي طولها مناسب (ده غير ان الضافر الطويلة اوي شكلها بيكون سيء جدا حتى لو ملوناها.)

4.زيت مقوي للاظافر cuticle oil:
ده بقى تضيفيه لروتينك اليومي، يعني كل ماترطبي ايدك تحطي كمان من الزيت ده لضوافرك والجلد المحيط بيها.
ده مهم اوي لانه حيغنيكي عن الباديكير وانك تضطري تشيلي الزوايد الجلدية اللي بتطلع جنب الضوافر لانه حيرطبها جدا،، وكمان مقوي للضوافر جدا جدا.
على الاقل اوعي تنامي بالليل من غير ماتدهنيهم.
الزيت ده موجود في اي صيدلية او مركز تجميل، مش لازم نفس النوع، هاتي اللي تلاقيه.
هو عبارة عن خليط من زيت اللوز والافوكادو وفيتامين E.. لو صعب تجيبيه ادهني زيت زيتون او جوز هند او خروع، كلهم يقضوا الغرض 😉.

5.حمام زيت :

لو عملتيه 3 مرات في الاسبوع يبقى كتر خيرك،،، حمام زيت للضوافر !!! ايوة، طب ازاي:

قبل النوم انقعي ضوافرك في صحن فيه زيت زيتون لمدة 10 دقايق وبعدين اعملي مساج لكل ضوفر ، والبسي جوانتي ونامي،،، حتقومي من النوم تدعيلي 😉

الحمام ده بيحسن الدورة الدموية للضوافر وبيقويها 👍.

6.جل معقم اليد

ابعدي تماما عن اي جل معقم لليد يحتوي على الكحول، لانه بينشف الضوافر جدا وطبعا بالتالي بيضعفها. لو صعب تلاقي نوع مافهوش كحول يبقى استغني عنه تماما وممكن تستبدليه بمناديل جونسون المبللة.

7. ضوافرك مش فتاحة علب 😉

ممنوع نهائي تفتحي علب المياه الغازية بضوافرك، او مثلا تخربشي كروت شحن الموبيل او اي حاجة بتسخدمي بيها ضوافرك. كدة انتي مش بتضعفيها لا، انتي بتموتيها😣.

8.الاسيتون.

طبعا كتر استعمال الاسيتون بيهلك الضوافر ويضعفها جدا، بعد استخدام الاسيتون رطبي ضوافرك بالزيت اللي اتكلمت عليه، ولازم تقللي من استخدام الاسيتون على قد ماتقدري،، حتى لو مكتوب عليه انه معاه زيوت مقوية للضوافر،، كله بيضعف.

لو انتي من الناس اللي بتحب تلون ضوافرها على طول، في حل يخلي المانيكير يفضل فترات اطول:

*طبعا تلبسي جوانتي اثناء غسيل الاطباق مافهاش فصال.

*لما يبدأ يقشر من فوق او ضوفرك يطلع من تحت، كملي الجزء ده بس بنفس اللون اللي انتي حاطاه وبعدين حطي كمان طبقة على كل الضوفر. كدة حتلاقي بدل ماكان بيوقعد معاكي يومين، ممكن يكمل اسبوع وترحمي نفسك من ضرر الاسيتون

9.الفيتامينات

طبعا لازم تهتمي بالفيتامينات المقوية للضوافر والشعر، زي البيوتين،، ده رائع وممكن تستخدميه فترات وتوقفي فترات، المهم دخليه جسمك كل شوية، ولو ضوافر ضعيفة اوي يبقى استمري عليه 3 شهور قبل ماتوقفي 💟

د. سالي فتحي،، اخصائية الطب النفسي وعلاج الادمان.

جروب الفيس بوك: 

Beauty secrets with dr. Sally Fathy

لينك جروب الفيس بوك 

https://m.facebook.com/groups/1743509399258731?ref=m_notif&notif_t=like