النظام الغذائي الصحي

ازيكم يابنات، 🌷

احب اعرفكم بنفسي الاول، انا د. سارة عاشور، اخصائي التغذية العلاجية وعلاج السمنة والنحافة.      
النهارده هنتكلم عن النظام الغذائي الصحي 💟💟 وايه هي مكونات الغذاء؟؟

مبدايا كده لازم نعرف ان الغذاء مكون من مجموعتين : مصادر الطاقه و المغذيات الدقيقه 👍
1.مجموعه مصادر الطاقه :  بتتكون من 3 مجموعات اساسيه هي النشويات و البروتين و الدهون وكل مجموعه منهم بتنقسم لمجموعات اصغر هنتكلم عنها بالتفصيل ..🌷
2.مجموعة المغذيات الدقيقه: و هي اللي بتحتوي علي الفيتامينات و الاملاح المعدنيه و العناصر النادرة .💟

النهارده هنتكلم عن اول مجموعه و هي مجموعة مصادر  الطاقه و هنبدا بالنشويات😉

 
**النشويات بتنقسم الي نشويات بسيطه و نشويات مركبه ،،،

 
أ...النشويات البسيطه: هي اسهل مصادر الطاقه في الهضم و الامتصاص و هي عباره عن السكر الابيض و سكر الفاكهه و العسل الابيض و المولاس و المجموعه ده يجب التقليل منها قدر المستطاع حيث ان سهوله تناولها و سرعة امتصاصها يؤدي الي ارتفاع نسبة الانسولين في الدم مما يؤدي الي  اجهاد البنكرياس و زيادة نسبه الاصابه بمرض السكري و تركز الدهون في منطقة البطن ...😯

ب...النشويات المركبة : تحتوي هذه المجموعه علي الحبوب مثل القمح و الارز و الشوفان و الدقيق  و النشا و تعتبر هذة المجموعة من النشويات مفيده اذا تم تناول الحبوب الكامله باعتدال مثل الخبز الاسمر و البليله 🌷..حيث انها تحتوي علي نسبة عاليه من الالياف الغذائيه فتستغرق وقت في هضمها مما يؤدي الي الشعور بالشبع لفترة اطول و ارتفاع بطىء في نسبة الانسولين👍👍...كما ان الالياف تقلل من امتصاص الدهون المضرة و تمنع الامساك🙆 ...

* يجب التقليل من الدقيق الابيض و النشا و يتم تناولهم باعتدال حيث انهم يحتوون علي سعرات حراريه عاليه .😦

*كما ان الحبوب الكامله تحتوي علي فيتامين ب المركب و بعض المعادن.🌷🌷

و ده نظام غذائي للاسبوع ده: 💟💟
الافطار :

 نصف رغيف + بيضه مسلوقه او شريحه جبن + سلطه + كوب شاي باللبن خالي الدسم  

سناك : ثمرة فاكهه
الغذاء :

 6 معالق ارز او مكرونه او نصف رغيف + طبق سلطه + خضار + ربع فرخه او 2 شريحة لحم او كفته او شريحة كبده مشوية
سناك : ثمرة فاكهه
العشاء :

 خارطة حبن قريش + سلطه

*مع شرب مالايقل عن 8 اكواب ماية يوميا ( العصاير والشاي والقهوة مش محسوبين)..

يارب تستفادوا من الموضوع🌷، وياريت تحاولوا تلتزموا بنظام الغذاء للاسبوع ده ، واشوفكم الاسبوع القادم 😘😘😘

جروب الفيس بوك 

Beauty secrets with dr. Sally Fathy

https://m.facebook.com/groups/1743509399258731?ref=m_notif&notif_t=like

علاج الصلع الوراثي في الاناث.

اهلا بيكم ... نكمل كلامنا عن الصلع الوراثى و البوست ده حيكون عن وسائل العلاج.
يا ترى الصلع الوراثى ممكن علاجه ؟؟
اه ممكن بس بشرطين ؛
أولا انك تفهمى طبيعة المشكلة وتتقبليها. يعنى إيه ؟
يعنى تفهمى ان دى مشكله وراثيه وبالتالى محتاجة علاج على طول ...يعنى مش كورس علاج و حيخلص؟ ﻷ
  على الاقل فى نوع علاج لازم تفضلى تستخدميه باستمرار و دى مش حاجة صعبه على فكره لانها حتبقى عاده عندك ...زى ما بسرح شعرى كل يوم ح ادهن العلاج كل يوم .
ثانيا : لو  اكتشفنا من الفحوصات ان فى مشكلة هرمونيه او تكيسات ع المبايض ... يبقى لازم تتابعى مع طبيب نساء عشان تعالجى المشكلة دى جنبا لجنب مع علاج الشعر.
طيب ايه العلاج :
1. دهان المينوكسيديل 2% ده اساسى فى العلاج ويضاف ليه اى حاجة من اللى حنقولها بعد كده مالم يكن فى موانع لاستخدامه.
*Regain  2%
* Hair back 2%
  6 بخات  صباحا ومساء.
طيب سمعت ان ادوية المينوكسيديل لو وقفتها شعرى حيقع جامد ده بجد؟؟؟؟....
اه بجد هوا حيقع فعلا بس مش بسبب المينوكسيديل ده بسبب ان عندك صلع وراثى وطالما وقفتى العلاج حيرجع يقع ...حيرجع لطبيعته اللى احنا شرحناها فى بوست الاسباب.
لو انتى من النوع اللى صعب يلتزم بدهان صبح وليل ممكن تجيبى تركيز 5% وتستخدمى 6 بخات مرة واحدة فى اليوم ...ما لكيش حجة
2. حقن الميزوثيرابى.
عاوزة اوضح حاجة بخصوص الميزوثيرابى فى الصلع الوراثى ... فى انواع  طبعا من الادوية بتكون مخصصة للصلع  الوراثى لاحتوائها على المينوكسيديل  او ديوتاستيرايد او ..... او ...    
بس لازم تفهمى ان الميزوثيرابى حيكون حل مؤقت وسريع الى حد ما ولكن صعب الاستمرار عليه لان مش منطقى نقعد نحقنك طول عمرك . لكن ممكن نعمل عدد من الجلسات ونكمل بعدها بالعلاج الموضعى .حلو الكلام ؟؟
3. حقن البلازما :
البلازما بتحتوى على مجموعة من معاملات النمو اللى بتساعد على تنشيط بصيلة الشعر فى حالات سقوط الشعر عامة وليس الصلع الوراثى على وجه الخصوص.
ولكن يسرى عليها نفس اللى قولناه عن الميزوثيرابى .
4. فى مجموعة من الادوية بتحتوى على مواد طبيعية ليها تأثير فى حالات الصلع الوراثى زى مادة اسمها saw palmetto
دى بنلاقيها فى ادويه زى
Revivogen
Kaminomoto hair growth accelerator.
Anagen plus solution  
Alpecin
5. فى بعض الادوية اللى ممكن تتاخد بالفم وتجيب نتيجة مع حالات الصلع الوراثى
Minoxidil 2.5 mg tab
ده مش متوفر فى مصر
Finastride
Flutamide
و دول ما ينفعش تاخديهم لو متزوجة وممكن تحملى
5. المراحل المتقدمة من الصلع الوراثى
Kaminomoto trigger        
6. اخر مرحلة مالهاش علاج غير زراعه الشعر لان بيكون حصل ضمور لبصيلات الشعر..... وعشان كده بنأكد على أهميه التشخيص المبكر والعلاج لحالات الصلع الوراثى. شعرك تاج جمالك ....حافظى عليه
لحديث أبي هريرة رضي الله عنه أن النبي صلى الله عليه وسلم قال ( مَنْ كَانَ لَهُ شَعْرٌ فَلْيُكْرِمْهُ ) رواه أبو داود.                                 
👱💁👧👸👸

د. السيدة طه،، مدرس مساعد امراض الجلدية والتناسلية والتجميل.، جامعة الاسكندرية

جروب الفيس بوك :

 Beauty secrets with dr. Sally Fathy

https://m.facebook.com/groups/1743509399258731?ref=m_notif&notif_t=like

اسباب الصلع الوراثي في الاناث

السلام عليكم ورحمة الله وبركاته. 
اتمنى انكم تكونوا استفدتم بالبوست اللى فات عن الهالات السوداء و بشكركم على التفاعل الايجابى وعلى كلامكم الحلو . ربنا يجعلنى عند حسن ظنكم
وبعتذر لاى حد بعتلى او سألنى ومقدرتش أرد عليه ...بحاول على أد ما أقدر والله المستعان.
والنهاردة ان شاء الله حنتكلم عن موضوع مهم وبيأثر على نسبة كبيرة من الستات . موضوعنا هو الصلع الوراثى اسبابه وتشخيصه وعلاجه .
اولا : ازاى اعرف ان سقوط الشعر الللى عندى وراثى ومش بسبب حاجة تانية 👧👧
ببساطة اللى بيميز سقوط الشعر الوراثى عن باقى اسباب سقوط الشعر هو التالى :
1. بداية المشكلة بتكون بعد سن البلوغ لكن التشخيص الفعلى ليها بيتأخر خصوصا فى الستات بسبب ان الموضوع بيكون تدريجى وببطء فمش بنلاحظه فى اوله . و طبعا مفيش اى علاقة بين النوع ده من سقوط الشعر والحجاب لكن كل القصة انه بيبدأ فى نفس السن اللى غالبا البنات بتبدأ تتحجب فيه.
2. اهم حاجة بتساعدنا فى تشخيص الصلع الوراثى فى الستات هيا شكله (hair loss pattern )  و ده ببساطة بيكون على شكل شجرة الكريسماس🎄🎄🎄 ...يعنى بتلاقى ان الفرق اللى فى وسط شعرك بيبدأ يوسع وفروة الراس تبدأ تبان خصوصا فى الجزء الامامى من منتصف الرأس لكن خط الشعر الامامى بيكون ثابت ( يعنى القصة حتفضل بخير).💁👩😁😁😁

يبقى اتفقنا ان علامة الانذار اللى حتلفت نظرنا لبداية المشكلة هيا فرق الشعر          
3. فى نسبة اقل من البنات الصلع عندهم بيكون شبه بتاع الرجالة يعنى يبدأ خط الشعر الامامى يرجع لورا من الجنبين .                                            
4. وجود عامل وراثى فى العيلة وده بتعرفيه ان اى حد من عيلة مامتك او باباكى عنده صلع وراثى👴👵 .....النقطة دى مش لازم تكون موجودة يعنى ممكن العامل الوراثى ميكونش ظاهر.
🔔🔔🔔🔔ليه بنهتم بالصلع الوراثى بالذات ...ما هو زيه زى اى سبب لسقوط الشعر ؟؟
لا هو مش زى اى سبب تانى وتشخيصه بدرى مهم جدا !!!!!! طيب ليه ؟؟؟؟ عشان 3 اسباب :
اولا ؛ و ده اهمهم ان ممكن الصلع الوراثى يكون علامه مهمة لاضطرابات الهرمونات الناتجه عن تكيسات بالمبايض  خصوصا لو كان مصاحب له اى حاجة من دول :
* زياده فى الوزن او ظهور للشعر فى اماكن غير معتاده فى البنات زى الوجه والرقبه والصدر او حب شباب وزياده فى دهنيه البشرة و فى الحالة دى لازم نطلب شويه تحاليل هرمونات وسونار على المبيضين.
ثانيا ؛ الصلع الوراثى مش بيقف عند حد معين. يعنى لو ما اخدتيش علاج حيفضل الشعر يخف لحد ما فروة الراس الامامية تفضى ....ربنا يعافينا جميعا.
ثالثا ؛   الصلع الوراثى علاجه بيختلف عن علاج الاسباب الاخرى لسقوط الشعر ....يعنى لو ما اتشخصتيش صح حتفضلى تاخدى فى علاجات ومنها اللى ممكن يكون غالى من غير ما تحسي بنتيجة بالعكس الموضوع بيزيد.                                                     

قبل ما نتكلم عن العلاج عاوزة ألفت نظركم لنقطة مهمة
....مفيش اى حاجة تمنع ان يكون عندك اكتر من سبب لسقوط الشعر يعنى ممكن يكون عندك صلع وراثى وكمان عندك انيميا او بتصبغى شعرك كتير او بتعملى سشوار او ....او  ....... فبالتالى شعرك يحتاج علاج المشاكل دى مع بعض.                                                   
للحديث بقيه فى بوست العلاج ...... استنونى ان شاء الله💕💕.

د.  السيدة طه (مدرس مساعد امراض الجلدية والتناسلية والتجمل ، جامعة الاسكندرية)

جروب الفيس بوك :

 Beauty secrets with dr. Sally Fathy

https://m.facebook.com/groups/1743509399258731?ref=m_notif&notif_t=like

فقد الرغبة الجنسية، اسبابها وعلاجها

ازيكم يا بنات، وحشتوني 😘😘😘

*ده تكملة لبوست الدورة الجنسية. 🌷🌷

*في البوست اللي اتكلمت فيه عن الدورة الجنسية الطبيعية، قولتلكم انها بتمر ب 4 مراحل، واني حتكلم عن المشاكل اللي ممكن تبقى موجودة في كل مرحلة.🌷

* اول مرحلة كانت الرغبة، وقولنا انها اساس العملية الجنسية، لانه من غيرها العملية مش حتتم.😯

*انهاردة حكلمكم عن الاسباب اللي ممكن تقلل الرغبة وازاي نعالجها. 💞

* طبعا الرغبة ممكن تقل عند الراجل اوالست. 😣

* اسباب ضعف الرغبة كتيرة ،، ححاول ابسطهالكم 💟

1. اسباب عضوية :

*يعني الانسان يبقى عنده مرض مزمن بيسبب ضعف في الرغبة، زي مثلا السكر، الضغط، امراض القلب.😦
*نقص هرمون التستوستيرون عن معدله الطبيعي، سواء في الست او الراجل. ( ماتستغربوش، الستات طبعا عندها هرمون التستوستيرون بس طبعا بنسب اقل من الراجل، وهو المسئول عن الرغبة). وده ممكن يقل لاسباب كتير جدا.
* زيادة هرمون اللبن( البرولاكتين) عند الست او الراجل،، بيسبب ضعف في الرغبة.

2.بعض الادوية:

*في ادوية من ضمن اثارها الجانبية انها بتقلل الرغبة، زي بعض مضادات الاكتئاب وبعض ادوية علاج ضغط الدم (beta blockers)

3.اسباب نفسية:

*ودي بقى ممكن نتكلم فيها للصبح 😀

*في امراض نفسية ممكن تسبب نقص في الرغبة، زي الاكتئاب والقلق،،، وفي اضطرابات نفسية جنسية خاصة بالعملية الجنسية، ودي اللي حتكلم عنها شوية.

أ. اضطراب نقص الرغبة الجنسية (hypoactive sexual desire disorder):

*ببساطة معناه غياب الرغبة الجنسية او التخيلات الجنسية.
*حبدأ بالكلام في الموضوع ده عند الرجال،،، المرض ده فيه منه انواع كتيرة.
1.ممكن يكون موجود عنده من البداية وناحية كل الستات: يعني عمره في حياته ماحس برغبة ناحية اي ست،،، النوع ده سببه مش معروف.😢
2. ممكن يكون كان فيه رغبة قبل كدة، لكن دلوقتي فقدها ناحية كل الستات،، وده ممكن يكون لأسباب عضوية زي ماقولت، او بسبب ادوية، او بسبب توتر او أكتئاب.😣
3.ممكن يكون كان فيه رغبة قبل كدة، لكن دلوقتي فقدها ناحية مراته فقط،، ودي ممكن تكون بأسباب توتر في العلاقة بينهم، او اسباب ترجع للست زي اهمالها في نضافتها ونفسها.😯
* بالنسبة للسيدات، ممكن يكون نقص الرغبة عندها بسبب عضوي، او نفسي، او بسبب ادوية، او بسبب توتر في العلاقة مع الزوج.

ب.المثلية الجنسية (homosexuality):

*يعني الرجل يكون عنده رغبة ناحية رجل زيه فقط، او العكس بالنسبة للست( بس النسبة اعلى بين الرجال). ودي اسبابها معقدة ومحتاجة شرح كتير،، بس ببساطة ده مش اختيار، ده بيكون غصب عن الشخص ان رغبته بتكون ناحية نفس النوع من جنسه.😢

العلاج:

*طبعا العلاج بيكون علاج السبب، بمعني :

1. لو مرض عضوي ، يتظبط
2.لو بسبب ادوية ، تتغير
3. لو بسبب توتر او اكتئاب، يتعالج
4.لو بسبب خلل في الهرمونات، تتظبط
5.لو نوع من الانوع النفسية اللي اتكلمت عنها، دي بتحتاج جلسات نفسية بنحاول فيها نصلح الاضطراب الموجود في عقل المريض.
6. لو مثلية جنسية: للأسف في اغلب الحالات مش بتتحسن..😣

* الخلاصة: ارجوكي اوعي تتكسفي انك تطلبي علاج للمشكلة دي سواء عندك او عند شريك حياتك، اوعي تتكسفي انك تطلبي حقك ،، لازم تروحوا لدكتور نفسي ويسمع منكم ويحاول يساعدكم في حل المشكلة،،، صدقوني العلاج بيفرق جدا.😙😙😙

*انا بيجيلي اسئلة كتير بسبب الموضوع ده وبستغرب جدا ليه بتسكتوا وليه مش بتلجأوا للدكتور.😦

*المرة الجاية حكمل مع اضطراب جديد في تاني مرحلة من مراحل الدورة الجنسية.💟💟

*يارب يكون الموضوع كان بسيط وعجبكم،،  لو سمحتم اعملوا share للموضوع عشان يوصل لكل الناس،، ممكن يكون سبب في انقاذ بيت من الانهيار.🌷🌷

  د.سالي فتحي ، اخصائية الطب النفسي وعلاج الادمان.

جروب الفيس بوك :

 Beauty secrets with dr. Sally Fathy

https://m.facebook.com/groups/1743509399258731?ref=m_notif&notif_t=like

طرق ازالة شعر الوجه وافضل طريقة للتخلص منه

**انهاردة يا بنات حكلمكم عن طرق ازالة شعر الوجه 🌷🌷

**كلامي ليكم ده حيكون من تجربة لكل الطرق دي وحرشحلكم ايه هي افضل طريقة 😘😘

** الاول لازم تعرفوا معلومة مهمة جدا عن ازالة الشعر :

1.كل الطرق اللي بتشيل الشعر من جذوره مش حتخليه يتقل لكن هي بتعمل مشكلة تانية بجانب انها مؤلمة جدا،، انها بتسبب ان سمك الشعر يتخن عن الاول، وحتلاحظي ان الشعرة بعد ماكانت رفيعة وشبهه الوبر ، باقيت تخينة،،، وده حيخليكي لازم تشيلي على طول لان المنظر مش حيبقى لطيف. 😣

 2.لو حتشيلي الشعر يبقى لازم لازم تغسلي وشك بماية وغسول قبل وبعد ماتشيليه، اوعي تكسلي عن الموضوع ده، لان بالذاب بعد ماتشيليه بيكون كل مسامات الوجه مفتوحة وممكن تدخل اي بكتيريا وطبعا حيزود الحبوب جدا.💟

3.يفضل بعد الازالة والغسل بالغسول انك تمسحيه بتونر عشان تلطفيه و تساعدي ان المسام تقفل شوية. 💟

**نيجي بقى لطرق الازالة : 🌷

1.الخيط:

طبعا دي الطريقة التقليدية عند اغلب البنات، وفعلا هي بتنضف كويس،،،، عيوبها بقى بجانب اللي قولته في اول البوست، انها بتطلع حبوب حتى لو غسلتي وشك زي ماقولت (طبعا لو ماغسلتيش اصلا وشك حيتبهدل من الحبوب ).😵

انا عن نفسي ماعرفتش يعني ايه حبوب غير لما استخدمت الطريقة دي😢 وللاسف استمريت عليها سنين 😣

2.السويت :

انا مش حتكلم كتير عنها لان دي بجد افشل طريقة ممكن تستخدميها لوشك،،،، اولا مع كتر الاستخدام بتسرع ظهور  التجاعيد وبتخلي الوش مترهل من كتر الشد والفرد،،،، ده غير انها ممكن تجرح وشك لان جلد الوش حساس جدا...😯

3.شرايح الشمع :

 زي فيت مثلا (veet) ..

طبعا الطريقة دي افضل من السويت من ناحية انها مش بتسبب ترهلات للوش،، لكن برضه ليها نفس عيوب ازالة الشعر اللي اتكلمت عنها في الاول. 😢

4. ماكينة ازالة الشعر :

اي مكنة ازالة للشعر زي براون مثلا بيكون ليها جزء مخصص

للاماكن الحساسة زي الوش،،،،، عيبها انها مش مؤلمة بس لاااا مؤلمة جدا جدا وبتطلع حبوب ،، هي بس افضل من السويت انها مش بتسبب ترهل. 🌷

5.التشقير

طبعا دي افضل واصح طريقة للتخلص من الشعر ودي انا برشحهالكم، ودي هي طريقتي المفضلة حاليا...😙😙😙

مميزاتها كتير جدا،،، مش بتطلع حبوب ، و طبعا غير مؤلمة بتاتا لانها مش بتشيل الشعر ، هي مجرد بتشقره،، ومع الاستمرار بتخفف سمك

الشعرة وبيرجع يرفع تاني زي بعد ماكان تخن بسبب طرق الازالة التانية،،،، وكمان بتنور الوش بطريقة وهمية لان فيه شعر صغير جدا مستحيل تعرفي تشيليه بأي طريقة وبيكون مسبب نقط سودة صغيرة مكانه على الوش،،، لكن بعد ما بتشقريه كل ده بيختفي.💟💟💟

***نصيحة مهمة: اوعي تجيبي اي نوع تشقير، لاني جربت انواع كتير،؛ماتجبيش غير جولين الاخضر 

 (اللي في الصورة)

واوعي تسترخصي وتجيبي جولي ايفا اللي في الصورة التانية،،  ده اسوأ كريم تشقير، لانه مش بيشقر ، هو بيعمل لون برتقالي غريب عجيب ومقزز 😯😯

* وطبعا بعد التشقير برضه تغسلي بغسول وتمسحي بتونر.

*ملحوظة مهمة: لو دي اول مرة تشقري فيها لازم تجربي الاول على ايدك عشان تشوفي حيعمل حساسية ولا لا.🌷

ده ممنوع 😯😯😯

6. الليز

طبعا دي للي عايز يريح دماغه، هي بس مش بتشيل الشعر نهائي، هي بتأخر نموه ، وبتحتاجي تكرري الجلسات،،، عيبها انها مكلفة ولازم تعمليها في مكان محترم عشان وشك مايبوظش..🌷

**يارب يكون الموضوع عجبكم وتكونوا استفادتوا منه..💞

لو سمحتي لو عجبك الموضع وعايزة كل الناس تشوفه

تقدري انك تشيريه (علامة المشاركة share 

 . 🌷🌷موجودة تحت على الشمال

  د.سالي فتحي ، اخصائية الطب النفسي وعلاج الادمان.

جروب الفيس بوك :

 Beauty secrets with dr. Sally Fathy

https://m.facebook.com/groups/1743509399258731?ref=m_notif&notif_t=like

الحقيقة وراء فرد الشعر بالبروتين،،، مقدمة من د. خالد سامي

طبعا اكيد سمعتى عن فرد الشعر بالكرياتين و البروتين او عملتيهم بالفعل و الحقيقه انه العالم كله كان بيعملهم زيك بدون تركيز لحد سنه 2013 لما جينيفر أنستون عملت البروتين و شعرها اتحرق واضطرت انها تقص شعرها كله و ظهرت صورها فى الجرايد والمجلات وده شد العالم كله عشان ينتبه لخطورتهم ..

قبل ما نتكلم عنهم بالتفصيل فى كذبة تجميل خلينى أعرفك انه صدر قرار بمنع استخدامهم فى الاتحاد الاوروبى وكندا كما بدأت منظمه الدواء الأمريكيه بدراستهم لتحديد خطورتهم و اطلقت تحذيرات للامريكان من استخدامهم

مبدئيا انتى عارفه ايه هو البروتين او الكيراتين ؟
الشعر بعيدا عن تفاصيل تركيبه بيتغطى بطبقه من الكيراتين و دى اللى بتحمى الشعر وبتحافظ عليه . وظهرت فى البرازيل علاجات لفرد الشعر تعتمد بالاساس على الكيراتين او مجموعه من الاحماض الامينيه ( البروتين ) يتم باستخدام الحراره الصاقها بالشعر بحيث تحيط بالشعره فتقوم بفردها وتغليفها وحمايتها من اى عوامل ممكن تأثر عليها سواء طبيعيه زى المايه و الحراره او عوامل الجو والتلوث وغيرها فالشعر يتفرد و يتعالج التقصف او الهيشان او غيره وبيستمر تأثيرها لفترات متفاوته بتمتد ل 3 شهور .. كل العلاجات دى بتسمى Brazilian Blowouts  عشان لو حبيتى تدورى بنفسك عليها

طبعا فى مقارنات مابين الاتنين وايهما افضل واللى غالبا بتكون لصالح البروتين لانه اسهل فى عمله وبياخد وقت اقصر و تقدرى تغسلى شعرك وتتعاملى معاه بشكل طبيعى جدا بعده عكس الكيراتين اللى بتحتاجى تستنى 3 ايام على الاقل بعده ، كمان البروتين بيستخدم لكل انواع وحالات الشعر حتى المصبوغ و بيقعد فترات اطول لكن المقارنه مش موضوعنا حاليا

طيب يعنى فين المشكله برضه ؟
طبعا سمعتى كتير من الكوافيرات و الدكاتره وغيره ان الانواع الوحشه فيها فورمالين وانه ده مضر جدا وبيبوظ الشعر وانك لازم تستخدمى انواع نضيفه خاليه من الفورمالين وطبعا صالونات التجميل الكبيره عملتلك اعلانات عن البروتين والكيراتين الخالى من الفورمالين ، صح ؟

معلش بقى مضطر أقولك انهم ضحكوا عليكى أو هما نفسهم مضحوك عليهم لانهم لو عرفوا اللى بيعملوه للناس بيضرهم قد ايه شخصيا كانوا غيروا المهنه

مبدئيا كل المنتجات المستخدمه لفرد الشعر بتحتوى على مركب الفورمالديهايد وده الماده الاساسيه اللى مع الحراره بتكسر البروتين او الكيراتين وتلزقه حوالين الشعر ، وده معناه انه مفيش حاجه اسمها بروتين وكيراتين من غير فورمالين .. ماده الفورمالديهايد هى ماده مسرطنه وممنوع التعرض لها بتركيزات عاليه لانها بتسبب الليوكيميا ( سرطان الدم ) و سرطان البلعوم والحنجره كما ان التعرض لغاز الفورمالديهايد الناتج من تفاعله مع الحراره يسبب التهابات بالعين خاصه القرنيه و مع الاستمرار قد يسبب قرح بها ( خلى بالك من الكوافيرات اللى بيعملوه بكثره هتلاقيهم دايما بيشتكوا من حساسيه و حرقان بالعين مش بتتعالج مع حساسيه بالصدر وكحه )

طيب اومال ايه حكايه المنتجات الخاليه من الفورمالين ؟
بعد انتشار المعلومات اللى قولتهالك من شويه الشركات ابتدت تطلع منتجات تكتب عليها خاليه من الفورمالديهايد بسبب الذعر اللى أصاب الناس واساسا اللى ده شغلهم وعشان كده هيئه الرقابه على الصناعات فى الولايات المتحده بدأت تعمل ابحاث على صالونات التجميل فلقوا نسب عاليه من الفورمالديهايد موجوده فى الهواء فى الصالونات حتى مع استخدامهم المنتجات دى .. الحقيقه اللى طلعتها الابحاث هى ان الشركات استخدمت ماده اسمها ميثايل جلايكول بدل الفورمالديهايد عشان الناس تتطمن لكن الحقيقه ان الماده دى مع المايه والحراره بتتحول للفورمالديهايد عشان تعمل نفس الوظيفه فى فرد الشعر .. عشان كده ولايه كاليفورنيا مثلا اجبرت الشركات على انها تكتب على منتجاتها انها تحتوى على الفورمالديهايد ومنعتهم من استخدام عبارات ( خالى من الفورمالديهايد ) اللى الشركات بتحطها فى ولايات تانيه وخارج الولايات المتحده

ايه الوضع حاليا طيب ؟
الحقيقه انه ال Brazilian Blowout  أصبح ممنوع فى الاتحاد الاوروبى و كندا بشكل نهائى بينما فى الولايات المتحده لا يزال تحت الدراسه من منظمه الدواء الامريكيه وان كانت حذرت من استخدامه .. فى البرازيل و باقى العالم بيستخدم بحريه وبكثره وكل البنات و السيدات بيتهافتوا عليه مش هتكلم عن مصر لان اصلا مفيش رقابه على حاجه و اصلا انتى عمرك ما هتعرفى مصدره ولا صناعته لانى احب اقولك ان الصالونات نفسهم ميعرفوش والشركات و المستوردين بيضحكوا عليهم

عارف هتسألينى طب أعمله ولا لأ وهل هو مفيد ولا مضر ؟
من ناحيه مفيد فهو مفيد لانه بيصلح الهيشان والتقصف وبيفرد الشعر وبيخلى شكله أفضل ولو انتى جربتيه او حد تعرفيه جربه هيقولك ده ، طبعا ممكن يحصل منه مشاكل زى ما حكيتلك ان جينيفر انستون شعرها باظ واضطرت تقصه بسبب البروتين
 
طيب بالنسبه لمخاطره ، برضه زى ما قولنا كل المنتجات دى فيها فورمالديهايد ودى ماده مسرطنه بتسبب سرطان البلعوم وسرطان الدم مع التعرض المستمر غير الاثار الجانبيه زى حساسيه العين و الصدر يعنى لو دى شغلتك بلاش منها لانك بعد كام سنه للاسف نسبه اصابتك بالسرطانات دى هتكون مرتفعه جدا ، لكن لو بتعمليه لشعرك على فترات متباعده كل سنه مثلا فطبعا تعرضك ده قليل واحتماليه اصابتك بالسرطان موجوده ولكن بنسبه اقل من العاملين الا لو انتى مدمنه على فرد شعرك كل 3 شهور لان ده تعرض مستمر .. فى النهايه زى اى حاجه فى الحياه  انتى المسئوله ، اوزنى الفوايد والاضرار و اختارى الأنسب ليكى طالما عرفتى المعلومات كلها بشكل صحيح

أتمنى أكون قدرت أوصلك المعلومات بشكل واضح ومبسط وعذرا للاطاله.. ومع كل حلقه من حلقات كذبه تجميل هحاول أساعدك تعرفى الحقايق اللى بيداروها عنك .. فتابعينا فى حلقاتنا القادمه ان شاء الله

د / خالد سامى

طريقة الحمام المغربي بالمنزل

بوست الحمام المغربي يا أجمل البنات:💞💞

** اولا لازم تعرفوا فوايد الحمام المغربي ايه عشان ماتكسلوش ابدا عنه:
1.بيشيل كل طبقة الجلد الميت من على جسمك (طبعا لو دي اول مرة تعمليه حتتفجعي من اللي حينزل من جلدك 🙈🙈)
2.بيدي نعومة مش طبيعية للجلد.🌷
3. انتعاش مابعده انتعاش, وثقة في النفس رهيبة ( ماهو أكيد لما جلدك يبقى عامل زي جلد الاطفال ماحدش حيعرف يكلمك)😀😀
4.بيوحد لون الجلد ويفتح الاماكن الغامقة.💟
5. راحة نفسية واسترخاء فظيع ( تقدري تقولي مضاد للاكتئاب سريع المفعول)😍😍

**ماينفعش توقعدي اكتر من شهر من غير ماتعمليه, هو المفروض اصلا كل اسبوع يتعمل, بس طبعا انا عارفة انكم كسلانين 😊, فا عشان خاطري ماتتأخريش عن اسبوعين, عشان تستفادي منه, و خصوصا انك حتعمليه في البيت, يعني ولا حتروحي صالون تجميل ولا حاجة, ومش حيكلفك اي حاجة.

** نيجي بقى للمطلوب للحمام المغربي:
1.ليفة مغربية ( موجودة في اي صيدلية).
2.ليفة زي اللي في الصورة التانية 😊
3.دلكة سودانية (موجودة عند اي عطار).
4.سكرب للجسم بحبيبات السكر من bath and body works ,,, لو صعب تجيبيه حتستخدمي بداله بن(قهوة يعني)😊.
5.مرطب قوي .

** نيجي بقى للطريقة:
1.لازم تسخني الحمام كويس اوي لمدة ربع ساعة قبل ماتدخلي,, سيبي الماية السخنة شغالة ربع ساعة.🌷
2.لما تدخلي لازم تستخدمي اسخن ماية ممكن جسمك يتحملها.🌷
3.اوعي تغسلي شعرك الاول, غسيل الشعر في الاخر خالص, وممكن تلبسي شاور كاب لو مش عايزة تغسلي شعرك.
4.بليفة عادية  و شاور جل حتنضفي جسمك كله الاول و تشطفيه.
5.تفردي علي جسمك كله الدلكة السودانية, وتفضلي تدعكي فيها لحد مايبانلك صاحب😂😂. وتسيبيها على جسمك لحد ماتنشف وجسمك يتشربها.. في الوقت ده عشان ماتزهقيش ممكن تعملي سنفرة لوشك بالغسول بتاعك.
6.بعد ماتنشف الدلكة تيجيبي الليفة المغربية (تكوني ناقعاها في ماية سخنة اول ماتدخلي) وتليفي جسمك كله بيها, حتلاقي الدلكة بتطلع بالجلد الميت, بعدين تشطفي , لون جلدك حتلاقيه وردي وبيلمع.😙
7.بالليفة اللي في تاني صورة (حتلاقوها في كارفور) تفردي عليها السكرب اللي بالسكر , او بن (تكوني عجناه بمية) وتدلكي جسمك كله تاني بيها وبعدين تشطفي.🌷
8.حتعملي رجلك زي ماقولنا في بوست العناية بالقدم.👍
9.بعد ماتخلصي ماتنشفيش جسمك اوي, سيبيه مندي شوية, وتدهني جسمك كله بالمرطب (جرجنز اللي في الصورة ) بيرطب بطريقة خيالية,, لو مش عندك ممكن تدهني زيت جونسون بتاع الاطفال.

**طبعا بعد ماتخلصي حتحسي انك اتولدتي من جديد 😀😍😉

** لو عجبكم البوست لو سمحتوا دوسوا لايك وضيفوا كل صاحباتكم للجروب واعملوا شير للبوست من لينك المدونة اللي انا حاطاه,, عايزين العالم كله ينتعش ,,, وزي ماوعدتكم لسة عندي كتييييير😉

  د.سالي فتحي ، اخصائية الطب النفسي وعلاج الادمان.

جروب الفيس بوك :

 Beauty secrets with dr. Sally Fathy

https://m.facebook.com/groups/1743509399258731?ref=m_notif&notif_t=like

الدورة الجنسية الطبيعية

**انهاردة حكلمكم عن موضوع مهم جدا جدا،،، 🌷وبحكم شغلي وتخصصي في الطب النفسي بشوف حالات كتير عندها مشاكل في الموضوع ده ،، وبسببه ممكن تتحول الحياة الزوجية الى جحيم 😢

**موضوع انهاردة هو عن العلاقة الجنسية.💟

**للأسف وجودنا في مجتمعات عربية بيفرض علينا قيود كتير في الثقافة الجنسية، لإن ناس كتير بتعتبر الكلام في الحاجات دي قلة أدب، وده طبعا بيؤدي إلى ان الراجل والست بيتجوزوا وتقريبا معلوماتهم الصحيحة في العلاقة الجنسية تقريبا منعدمة،، لإن أغلب معلوماتهم بيعتمدوا عليها من الكتب الرخيصة اللي بتتباع على الأرصفة او من صفحات الأنترنت الغير علمية او من الأصحاب، وطبعا أغلبها معلومات ينقصها الكثير.😦

**بعد الزواج بيصتدم الراجل والست بالواقع، ان ماحدش فيهم فاهم طبيعة التاني ومتطلباته ،، و طبعا الموضوع بياخود سنين عقبال مايبدأوا يفهموا بعض، واحيانا كتير بيفضلوا مش فاهمين بعض للأخر.  😣

** عشان كدة لازم اي انسان بالغ وناضج يفهم يعني ايه ثقافة جنسية بشكل علمي وصحيح . 🌷

**عشان كدة اخترت اكلمكم انهاردة عن الدورة الجنسية الطبيعية اللي بيمر بيها الراجل والست اثناء ممارسة العلاقة الجنسية. 👍

1- ماهي الدورة الجنسية (sexual cycle)  :

*  هى عبارة عن 4 مراحل بتحصل عند كل راجل و ست اثناء ممارسه العلاقه الجنسيه...
* أي اضطراب في العلاقة الجنسية بيكون نتيجة خلل في مرحلة من المراحل دي،، وكل مرحلة بتؤدي لإضطراب معين بيختلف في أعراضه وعلاجه عن الإضطرابات التانية..
** عشان نفهم كويس اوي ايه الإضطرابات دي لازم نفهم الاول العلاقة الطبيعية وتسلسلها بعيدا عن اي خلل.💞

2- مراحل الدورة الجنسية (phases ) :

أ- الرغبة (Desire ) :
*الرغبه ،ودى طبعا مهمه جدا ان الواحد يبقى عنده رغبه من الأساس عشان يقدر يكمل العمليه كلها لان من غير رغبه الدوره مش حتكمل.. طبعا في اسباب كتير بتقلل الرغبة عند الست والراجل، منها اسباب نفسية او عضوية،،، وحنتكلم عليها بعدين 😉

 ب- الاستثارة (Exitation) :
*الاستثاره و ازاى بتحصل عند الست والراجل و الفرق بينهم..
*الست يمكن اثارتها باللمس أما الرجل فا بالنظر،،، عشان كدة اهتمام الست بمظهرها ده شيء أساسي لان هو ده مفتاح إثارة الرجل، وفي نفس الوقت لازم الراجل يفهم ان الست إثارتها بتكون حسية وتعتمد على اللمس والمداعبة..
*المرحله دى مهمة جدا ولازم تاخد وقتها على الاخر بدون اي إستعجال لأنها هي اللي بتمهد للمراحل التانية،،، وممكن تمتد من دقايق لساعات..
*ايه هي علامات المرحله دى :
سرعة في معدل التنفس،،، سرعة في ضربات القلب،،، انتصاب حلمات الصدر للرجل والانثى (Erected nipples) ،،، احمرار في الجلد (الوجه والصدر والظهر) ،،، زيادة تدفق الدم للأعضاء التناسلية وبالتالي حيسبب انتصاب للرجل ( erected penis ) و عند الست افرازات مهبليه و انتفاخ في اعضائها التناسلية .( swelling of clitros, labia minora and vagina)🌷

ت- قمة الإستثارة (plateau ) :
*دي اقصى مراحل الإثارة و يتم فيها عمليه الجماع (coitus)، وبتزيد فيها جدا كل اعراض مرحلة الاستثارة اللي قولناها ،  واحيانا ممكن يحصل تشنج في عضلات الرجل واليد..💟

ث-الشبق (orgasim):
*دى اقصر  مراحل الدورة الجنسية وبتستمر لثواني قليلة، ودي مرحلة الذروة،،. في المرحلة دي بيحصل انقباضات لاإرادية في عضلات الحوض بتؤدي عند الرجل للقذف ( ejacultion)  و عند الست بتسبب انقباض فى عضلات المهبل (vagina)  والرحم، واحيانا بيحصل احمرار في الجسم...
*طبعا في ستات كتير مش بتوصل للمرحلة دي في اول فترات الزواج وأحيانا مش بتوصل ابدأ،،، ودي من ضمن المشاكل اللي حتكلم عنها بعدين..😯

*** بعد مرحلة الشبق بتيجي فترة الإرتياح (resolution )،،، في الفترة دي الجسم بيبدأ يرجع لطبيعته، وبيقل انتفاخ الأعضاء التناسلية للراجل والست، وبيرجع التنفس وضربات القلب لمعدلاتها الطبيعية. الفترة دي هي فترة الاحساس بالسعادة والحميمية.. بس الفترة دي فيها إختلاف كبير عند الست والراجل،،،  الراجل بيدخل في فترة راحه (refractory period) ميقدرش يحصل فيها انتصاب تاني مدتها بتختلف من راجل للتانى و تتوقف على عوامل صحيه مختلفه و مدتها بتطول مع التقدم فى السن... لكن عند الست مفيش فترة الراحة دي  ومن الممكن انها تقدر توصل للشبق (orgasm) مرات متتاليه...😊💟🌷

**يارب يكون اسلوبي بسيط وعجبكم😘😘😘.. في البوستات اللي جاية حنتكلم عن مشاكل كل مرحلة من المراحل دي وطرق علاجها والتغلب عليها... 💞💞💞

لو عجبكم الموضوع تقدروا تعملوا share لأي مكان تحبوه.🌷🌷

*حستنى تعليقاتكم على المدونة هنا او على الجروب بتاعي على الفيس بوك 

  د.سالي فتحي ، اخصائية الطب النفسي وعلاج الادمان.

جروب الفيس بوك :

 Beauty secrets with dr. Sally Fathy

https://m.facebook.com/groups/1743509399258731?ref=m_notif&notif_t=like

العناية بالجسم والجمال 3

صباح الخير يا قمرات،، بصوا عشان موضوع dry body brush  ده مهم جدا، مش عايزاكم تدفعوا فلوسكم في اي فرشة، نصيحة هاتوا اللي قولت عليها بس، موجودة في محلات بادي شوب، ،،،وخودوا بالكم عشان عندهم نوع بلاستك ونوع تاني خشب صغيرة من غير ايد،، لو سمحتم هاتوا دي بس، لان شعرها ناشف شوية، الباقي ناعم زيادة عن اللزوم وزي قلتها، ماتخافيش مش حتجرح جلدك ، النوع ده هو ال best seller،، لما تستخدميها زي ماقولتلك حتلاقي الجلد الميت بيطلع زي البودرة من جسمك، هاتوها وحتدعولي 😘😘😘

***  د.سالي فتحي ، اخصائية الطب النفسي وعلاج الادمان.

جروب الفيس بوك :

 Beauty secrets with dr. Sally Fathy

https://m.facebook.com/groups/1743509399258731?ref=m_notif&notif_t=like

شرح إشاعة تسبب بودرة جونسون للسرطان

صباح الخير يا قمرات💞💞، عايزة بس اوضحلكم حاجة عشان كذا واحدة لاقيتها داخلة تنصح الناس ان بودرة التلك بتسبب السرطان، اولا ارجوكم اتأكدوا من اي معلومة من الدكتور قبل ماتنشروها وسط الناس. قصة بقى التلك باودر ان كان فيه بعض السيدات بتستخدمها في المنطقة الحساسة،وكمان الجوانتيات بتاعة دكاترة النسا اللي بيستخدموها في الفحص كان بيبقى فيها بودرة تلك،  وبإعتبارها جسم غريب لما دخلت جوة جسمهم تسببت عند البعض في سرطان للمبيض، لكن البودرة نفسها مش مسرطنة طبعا ولا الكلام ده مادام بتستخدميها على الجلد،، انا شخصيا بستخدمها لوشي وبستخدمها لولادي. اهدوا بقى وبلاش تنشروا الزعر وسط العضوات الآمنات 😀😀😀
وماتنسوش، لينك كل بوستاتي في ال pinned post 😘😘😘

د.سالي فتحي ، اخصائية الطب النفسي وعلاج الادمان.

جروب الفيس بوك :

 Beauty secrets with dr. Sally Fathy

https://m.facebook.com/groups/1743509399258731?ref=m_notif&notif_t=like

يعني ايه برايمر

في ناس كتير بتسألني يعني ايه برايمر وبيعمل ايه، انا حقولكم وصف ليه حيفهمكم اهميته. عارفين لما واحد يدهن حيطة على الاسمنت على طول من غير معجون وواحد تاني  يمعجنها 😀😀😀 اهو المعجون ده هو البرايمر 😂😂😂. والله نفس الفكرة،، الحيطة اللي بدون معجون بتبقى معضعضة ولونها مش زاهي واللي بمعجون بتبقى منورة ومتجانسة. عرفتم بقى البرايمر مهم ازاي 😀🌷🌷🌷
من واقع خبرتي السابقة، اصلي كنت بشتغل مبيض محارة بعد الضهر 😀😀😀

***    د.سالي فتحي ، اخصائية الطب النفسي وعلاج الادمان.

جروب الفيس بوك :

 Beauty secrets with dr. Sally Fathy

https://m.facebook.com/groups/1743509399258731?ref=m_notif&notif_t=like

العناية بالبشرة الدهنية

ازيكم يابنات 😘
ده بوست العناية بالبشرة الدهنية
اصحاب البشرة الجافة او المختلطة (زي حالاتي 😊) تنفعهم كل كريمات بوست العناية بالبشرة اللي عملته قبل كدة،،، اما اصحاب البشرة الدهنية ، انا عارفة انهم بيعانوا وجربوا حاجات كتير ومافيش تحسن، احب اطمنكم ان الحل موجود واتحدى كل واحدة تجرب اللي حقوله ده وماتتحسنش 💞
معلش هي الكريمات حتكلفك شوية بس اوعي تستخسري في نفسك لانك تستاهلي الاحسن...
دي منتجات شجرة الشاي tea tree من the body shop ، والله حتنسي قصة البشرة الدهنية دي وحتدعيلي لو عملتي بالنصايح دي

1. ده الغسول اللي حتستعمليه يوميا صبح وليل، بينضف جدا ومنعش جدا جدا وبيقلل تكوين الدهون في الوش.

2. التونر: تستخدميه بعد الغسول، تبلي قطنة منه ، بس لازم ترجيه الاول كويس اوي،، وتمسحي وشك ورقبتك،،، ده بقى حيقضي على اي دهون ممكن وشك يكونها اليوم كله.

3. ده برايمر للي بيستخدم فاونديشن،، حتحطي منه الاول وبعدين الفاونديشن،، ده كمان رهيب وحيقضي على اخر امل لوشك انه يكون اي دهون 😁😁😁.

جربوه وحتدعولي والله،، وعلى فكرة بادي شوب عامل sale دلوقتي 50% وكل المنتجات دي عليها تخفيض، إلحقي هاتي قبل مايخلص ال sale.

ياريت اللي حيعمل بنصيحتي ويجيب الحاجات دي يبعتلي بعد مايجرب ويقولي النتيجة بنفسه وانا حنزلها على الجروب 😘😘😘

شوية وحنزل باقي بوست الصحة والرشاقة 💞💞💞
يارب تكونوا انبستطوا من البوست 😙

*** د.سالي فتحي ، اخصائية الطب النفسي وعلاج الادمان.

جروب الفيس بوك :

 Beauty secrets with dr. Sally Fathy

https://m.facebook.com/groups/1743509399258731?ref=m_notif&notif_t=like

العناية بالجسم والجمال 2

ده باقي بوست الصحة والجمال.
اولا انا مبسوطة جدا ان البوست امبارح عجبكم و قريت كومنتاتكم وفرحتني جدا 💞

طبعا اغلبنا مهمل في حاجات كتير بس بسيطة والله وبتفرق جدا في الصحة والرشاقة كمان، عايزاكي تعتبريها من دلوقتي روتينك اليومي. ياريت نصايح بوست امبارح تكونوا بدأتم تنفذوها ونضيف عليها بوست انهاردة  👍

1. كونك انثى فده بيعرضك لنقص مزمن في فيتاميناتك واحيانا لأنيميا عند بنات كتير، وده بسبب عوامل كتيرة اوي، زي الدم اللي بتفقديه كل شهر،، الحمل،،الرضاعة. عشان كدة لازم تعودي نفسك على مجموعة فيتامينات تاخديها بإستمرار زي سنترم مثلا (centrum) . ممكن عشان ماتستخدميهوش كتير ممكن تاخديه شهرين مثلا وتريحي شهر وهكذا.

2. برضه كونك انثى 😀 ده بيعرضك برضه لنقص الكالسيوم 😊،، سواء بسبب حمل او رضاعة او بعد سن انقطاع الدورة لان هرمون الاستروجين بيقل وبيسبب نقص في الكالسيوم، عشان  كدة برضه اي بنت لازم تاخود كالسيوم، لو بترضعي لازم تستمري عليه طول فترة الرضاعة، ولو وصلتي لسن انقطاع الدورة لازم تاخديه كل يوم، غير كدة ممكن برضه تاخديه شوية وتوقفي شوية

3. Omega 3 
كبسولات الاوميجا 3 من اهم الحاجات اللي لازم تاخديها بإستمرار لو اكلك مافيهوش اوميجا 3، زي الاسماك او المكسرات. اوميجا 3 مهمة للصحة العامة، للذاكرة، للاكتئاب، للشعر.

4.من اهم اسرار البشرة الحلوة والرشاقة هي الماية،،، لاااااااازم تشربي يوميا على الاقل 2 ليتر ماية ( مش محسوب فيهم اي مشروبات تانية) اشربي كل شوية ، من غير ماتبقى عطشانة، في الاول برضه حتنسي كتير، بس لما تعودي نفسك على كدة خلاص مش حتنسي.

5. ماينفعش يومك يعدي من غير كوباية شاي اخضر على الاقل 1، الشاي الاخضر في مضادات اكسدة، ودي مهمة طبعا للصحة العامة و للجسم وللبشرة، ده غير انه ببخسس كمان 😉.. بس ياريت تحاولى تشربيه من غير سكر.

6. من الاسرار اللي ناس كتير ماتعرفهاش هي dark choclate او الشيكولاتة الغامقة، طبعا حتلاقيها متوفرة في اي سوبر ماركت كبير، بس عشان تستفيدي منها صح ياريت تجيبيها نسبة الكاكاو لاتقل عن 70% ، وكل ماتزيد النسبة تبقى احسن طبعا. الشيكولاتة الغامقة مليانة مضادات اكسدة اللي قولت انها مفيدة جدا للجسم. في الاول حتستغربي طعمها، بس لو اتعودتي عليها مش حتعرفي تبطليها 😁

ياريت تعودي نفسك من دلوقتي على الحاجات دي وحتفرق معاكي اوي اوي في صحتك، في نفسيتك، في شعرك، في كل حاجة 😙😙😙
دي كلها حاجات بسيطة ياريت تبدأوا بيها الاول، ولسة حكلمكم في بوستات تانية كتيييير عن ازاي تغيري نظام حياتك من ناحية الاكل عشان تفضلي رشيقة وجميلة، والتخين حيخس برضه 😊😙💞

د.سالي فتحي ، اخصائية الطب النفسي وعلاج الادمان.

جروب الفيس بوك :

 Beauty secrets with dr. Sally Fathy

https://m.facebook.com/groups/1743509399258731?ref=m_notif&notif_t=like

طريقة بسيطة جدا للميك اب

وصل وصل وصل
بوست البنات اللي مش عايزة تحط ميك اب وصل 😘😘😘
بصوا بقى اكيد انا مش كل يوم الصبح بقوم اعمل الميك اب اللي في البوست اللي فات، في ايام كتير بقوم ماليش مزاج او مافيش وقت اوي(مع انه مش بياخود وقت اوي هما ربع ساعة بس) بس برضه ساعات بحس اني مش فايقة، وفي نفس الوقت فكرة اني اغسل وشي وانزل دي مش في قاموس  حياتي 😀، الحل ايه بقى!
هو البوست ده ،،، ميك اب اتحداكي لو اخد اكتر من دقيقتين ووشك حيبقى رايق ومنور

1. خلاص اتفقنا مافهوش فصال تغسلي وشك بغسول ثم تمسحي بقطنة مبلولة بتونر ثم كريم مرطب طبعا.

2.باودر الاطفال جونسون( من غير اندهاش 😀) حتحطي حبة في كف ايدك وتوزعيه كويس على وشك وحوالين عينك  ورقبتك وتمسحي الزيادات بالراحة خالص، ماتخافيش وشك مش حيبقى ابيض ولا حاجة، جربي ومش حتصدقي النتيجة.

3.شوية بلاشر خفيف على خدودك، بيفرق جدا في شكلك،، بلاش تنزلي وشك اصفر الله يكرمك 😀

4. كحل اسود على خط الرموش اللي تحت + ماسكرا.

5. ملمع للشفاه، ده مش بيدي اي لون، مجرد لمعة وطعمة يهبل، انا باكله اصلا 😀. بجد النوع ده رهيب لانه كله مواد طببعية وفي منه بطعم الفراولة اوالنعناع، بيدي لامعة و volume للشفايف يجنن. موجود في bath and body works. بلاش عشان خاطري تنزلي بشفايفك الجميلة وهي ناشفة ومشققة 😀 ، والله بيفرق في الشكل جدااااا.
اتحداكي لو الكلام ده اخد اكتر من دقيقتين، وفي الاخر حتنزلي بنوتة جميلة وشك منور ومش حاطة حاجة. 💞💞💞
لينك البوست انا ضيفته لل pinned post . لو سمحتم بقى ضيفوا كل صاحباتكم عشان لسة عندي كتييييير اوي 💟💟

د.سالي فتحي ، اخصائية الطب النفسي وعلاج الادمان.

جروب الفيس بوك :

 Beauty secrets with dr. Sally Fathy

https://m.facebook.com/groups/1743509399258731?ref=m_notif&notif_t=like

الطريقة الصحيحة لاستخدام قطعة الحلاقة من مكنة براون سيلك ابيل

توضيح مهم لبوست امبارح، في ناس كتير سألتني عن مكنة براون وملخبطين بينها وبين قطعة الاماكن الحساسة. دي يا جماعة مش ملاقيط، دي shaving يعني حلاقة ،، وطبعا ماتتقرنش اصلا ب gillette venus ، لان دي فعلا بتعمل انعم وزيرو. حوضحلكم طريقة شغلها لان كتير مش عارفينها،،،. زي مانا موضحة في الصورة حتبدأي تشيلي الشعر بالجنب (رقم 1) ده بيشيله على 1 بس،،، بعد ماتخلصي تمشي عليها بالسطح المخرم (رقم 2) وتظغطي شوية، حتلاقيه بيشيل كل الزيادات والنتيجة كأنك عاملة sweet بالظبط... يارب تكون المعلومة وصلت 💞😘😘
*** القطعة دي مش بتتباع لوحدها، دي قطعة ضمن القطع اللي مع المكنة 🌷
لو سمحتي لو عجبك البوست اضغطي لايك وضيفي كل صاحباتك( الجروب لكل البنات مش للأطباء بس ).. اشوفكم بالليل في بوست العناية بالقدم 💞💞

د.سالي فتحي ، اخصائية الطب النفسي وعلاج الادمان.

جروب الفيس بوك :

 Beauty secrets with dr. Sally Fathy

https://m.facebook.com/groups/1743509399258731?ref=m_notif&notif_t=like

العناية بالقدمين

بوست العناية بالقدمين يا قمرات 💟💟💟:

***اوعدك بعد البوست ده مش حتبطلي فرجة على رجلك من جمالها ونعومتها 😊😊

*اولا نتفق اتفاق، ماينفعش اي بنوتة جميلة رجلها تبقى ناشفة او مشققة واحيانا كمان مش نضيفة  🙈 ده ليكي مش لاي مخلوق تاني،،، انتي انثى يعني مصدر الجمال، ومافيش ست في الدنيا وحشة ابدا، لكن فيه ست مهملة في نفسها.

*الاول حتكلم عن ازاي نعالج الرجل المتشققة وبعدين حقول ازاي نحافظ على جمالها 🌷

*انا مش بروح اعمل بديكير برة البيت اصلا، ممكن نفسي تهفني مرة في السنة ولا حاجة، لاني مش محتاجاة اصلا، والطريقة اللي بيعملوها في الكوافير مش مقتنعة بيه.

1.اللي في اول صورة دي مش حتحتاجي تستخدميها كتير لو رجلك حلوة وكنتي مهتمة بيها،، لو رجلك ناشفة ركزي معايا بقى:
*لاصحاب الرجل المشققة بس: كل يوم بالليل ولمدة اسبوع متواصل تنقعي رجلك في كروانة فيها ماية دافية وشامبو وتسيبيها ربع ساعة وبعدين تطلعي رجل رجل، تنشفيها بفوطة صغيرة وتدعكي الكعوب وتحت الصوابع  بالناحية الخشنة، طبعا حتلاقي الجلد الميت عمال ينزل،،، وبعدين تشطفي بشوية ماية وتنشفي وتعملي باقي الخطوات الي جاية.

2.لو رجلك ناعمة ومهتمة بيها مش حتحتاجي تستخدمي دي كتير، كفاية الترطيب بس. انا عموما بستخدمها كل شهر مثلا وانا في الشاور من غير نقع رجل ولا حاجة.
* ملحوظة: لو رجلك ناعمة اوعي تستخدميها كتير لانها حتخشن رجلك وحتطلع الجلد الناشف اسرع.

3. الخطوة دي برضه حتعمليها في الاول بس وبعد كدة مع الاهتمام والمداومة مش حتحتاجيها.... بسن المبرد حتنضفي جوانب الضوافر، بعد ماتخلصي دعك الكعوب،،، زي مانا موضحة في الصورة.

4.نيجي للترطيب: دي خطوة لازم تتعمل يوميا مافهاش فصال وإلا رجلك حترجع تنشف تاني. قبل ماتنامي تغسلي رجلك وتدعكيها بليفة تكوني مخصصاها للرجل بس،( ويستحسن تكون ليفة ناشفة شوية) ،،، ده لو انتي مش من الناس اللي حتعمل خطوة دعك الكعوب لمدة اسبوع، بالنسبة للناس اللي حتمشي على نظام الاسبوع ده حتعمل برضه الخطوة دي بعد ماتخلص الدعك.
بعد ماتنشفي حتدهني وش رجلك وبطنها كله بالدهان السحري اللي في الصورة ده،،، ده عبارة عن ايه، ركزي معايا
*فازلين جونسون + مسحوق دم الغسال + ازازة برفان صغيرة(ممكن اي عينة عندك)،،،، حتسيحي الفازلين في المايكروويف(لو ماعندكيش ممكن حمام ماية سخنة) وتخلطي فيه بودرة دم الغزال والبرفان،  وتقلبي كويس اوي.. دم الغزال موجود في اي ماركت او عطار..
*خودي بالك اوعي تحطي بودرة كتير عشان ماتحمرش اوي وتدي رجلك لون وحش، خلي لونها زي ماية الفراولة زي مانا موضحة في الصورة.. انا مش مصورة البودرة لانها خلصت، انا مصورة النتيجة النهائية للخلطة، وماقولكيش على ريحتها 👍
*ايه ميزة الخلطة السحرية دي: اولا الفازلين مرطب قوي جدا،،، بودة دم الغزال بتدي لون وهمي لرجلك لون مورد ورائع،،، البرفان بقى مع الفازلين ماقولكيش ريحته بتمسك ازاي، حتبقى عايزة تاكلي رجلك من حلاوة ريحتها ونعومتها ولونها المورد 😀😀😀.

5.خطوة مابعد الترطيب: طبعا بعد ماترطبي رجلك تلبسي شراب تقيل طول الليل،، لو انتي من الناس اللي حتعمل نظام الدعك لمدة اسبوع ورجلك ناشفة، حتلبسي كيس الاول وبعدين الشراب، واتفرجي الصبح على جمال رجلك.

6.من ضمن الحاجات اللي بتظهر جمال الرجل وبتقلب شكلها انك تحطي مانيكير ويستحسن يكون من الالوان الغامقة،، لو مش عايزة تحطي مانيكير حطي حنة سودة، بس تحطي كل مايطلع الضوفر ، بلاش الله يكرمك موضوع النص ضوفر ده عشان بيبقى منظره صعب 😀😀😀.

7. الخلخال: ده بقى بيدي انوثة مش طبيعية للرجل، لو مش حابة تلبسيه برة البيت خليه في بيتك بس. ياريت يكون حاجة رقيقة مش اوفر يعني،، زي اللي في الصورة كدة.

8.ممنوع منعا باتا تمشي حافية في البيت، نهائي، كدة رجلك حتكون جلد ناشف على طول،، ده غير ان اي بنوتة جميلة ماينفعش تمشي حافية 😘😘😘🌷

9. نيجي بقى لحاجات اختيارية وانتي وظروفك:
اللي في الصورة ده  foot scrub من بادي شوب بالنعناع، بستخدمه كل اسبوع وانا بدعك رجلي بالليفة،،، مش قادرة اقولك كمية الانتعاش اللي بتحسيها بعده.
بعده بدهن مرطب الرجل ده من bath and body works بالنعناع برضه ، عشان الانتعاش يكتمل 😀😀😀. طبعا اليوم اللي بدهنه فيه مش بدهن الفازلين، وطبعا بلبس شراب بعدها.

**لو عملتي بنصايحي دي مش حتصدقي رجلك حتتحول ازاي، وابقي افتكريني وادعيلي 💞💞💞.

**اخر صورتين انا بفكرك ازاي تغيري ال notification setting عشان يوصلك كل بوستاتي اول بأول،،، واخر صورة بفكركم بال pinned post اللي عليه كل لينكات بوستات الجروب من يوم ماعملته.😙😙

** واخيرا لو سمحتي لو عجبك البوست والمجهود اللي فيه ماتستخسريش فيا انك تدوسي لايك وتضيفي كل اصحابك البنات ايا كان وظيفتهم واعمارهم،، لازم تدعموني وتشجعوني عشان اقدر اكمل، وكل لما الاقيكم متفاعلين معايا انا كمان حبدع اكتر في بوستاتي، و بفكركم لسة عندي كتييييير 😉.

* د.سالي فتحي ، اخصائية الطب النفسي وعلاج الادمان.

جروب الفيس بوك :

 Beauty secrets with dr. Sally Fathy

https://m.facebook.com/groups/1743509399258731?ref=m_notif&notif_t=like