العناية بالجسم والجمال

انا جيت يا قمرات وجايبالكم معايا شوية نصايح للجمال والرشاقة والنفسية المتظبطة 👍👍😘.
طبعا ده مش كل حاجة تخص الموضوع ده، دي مجرد شوية اساسيات حنبدأ بيها وبعد كدة حدخل معاكم في البوستات الجاية في تفاصيل اكتر واكتر، بس المهم تكونوا طبقتوا دي الاول.🌷

1. لازم تبدأي يومك ب dry body brushing يعني فرشة الجسم على الناشف، الفرشة موجودة في the body shop دي بقى تعتبريها صباح الخير بتاعة كل يوم، فوايدها رهيبة ، ابسطها بتنشط الدورة الدموية في كل جسمك ، بتعالج السيليوليت ، بتشيل الجلد الميت من على جسمك كله، بصي مهما قولت فوايدها مش حنخلص 😊.
بنستخدمها ازاي بقى : طبعا بدون ماية او صابون ، على الناشف ،ولو حتاخدي شاور يبقى تعمليها قبل الشاور ، تبدأي من تحت لفوق، تبدأي من قدم رجلك وتسرحي على فوق وانتي طالعة بإتجاه القلب، ولما توصلي لدراعك تبدأي من صوابعك وتطلعي على كتفك وتنتهي لمكان القلب. انا حاطة صورة توضح الطريقة.

2.بعد ماتخلصي حتحسي كأنك شيلتي طبقة خشنة من جلدك، تقومي داهنة جسمك كله بأي مرطب خفيف عندك، اللي حاطة صورته ده من the body shop ميزته انه خفيف ومش بيلزق ، وحتحسي بعدها ان جلدك بقى عامل زي جلد الاطفال. حتحسي بالنتيجة بعد شهر من المداومة عليها.

3.لازم تعودي نفسك ان باطنك تبقى مشفوطة على طول، وانتي قاعدة ، وانتي ماشية، وانتي بتعملي اي حاجة،، طبعا كدة انتي بتقوي عضلات بطنك وكمان بطنك حتختفي ، في الاول حتلاقي نفسك بتنسي ، مع الوقت والاستمرار حتلاقي بطنك مشفوطة اوتوماتيك.

4. ضهرك مفرود ، وانتي ماشية، وانتي قاعدة، مافيش بنوتة حلوة تمشي تانية ضهرها ولا توقعد مش فاردة نفسها، دي ابسط قواعد الإتيكيت وكمان طبعا لصحتك.

5. Kegel excercise
اي بنت او ست لازم تعمل التمرين ده ، ده تمرين مقوي لعضلات الحوض وفوايده كتير جدا سواء للحامل او للبنت او للرجالة كمان، وده برضه عايز بوست لوحده عشان اتكلم عن فوايده.
بيتعمل ازاي بقى: بالظبط كأنك بتعملي بيبي وبتمسكيها 🙈🙈🙈، كل شوية فتح قفل،، ده تعمليه كل ماتفتكري، وانتي نايمة ، وانتي  قاعدة، وانتي بتتفرجي على التلفزيون، ماتبطليهوش ابدا.
**ملحوظة فوايد تمارين kegel (طبعا دي بعض الفوايد مش كلها) :
1.تقوية عضلات الحوض pelvic floor muscles
2. بتساعد في تقوية التحكم في البول للبنات اللي عندها بعض النقط بتنزل اثناء العطس او الضحك مثلا
3.تضييق منطقة المهبل بعد الولادة الطبيعية
4. بالنسبة للرجال: بتساعد في تأخير القذف

6. اتعودي تحركي نفسك شوية وبلاش تستسهلي كل حاجة، يعني لو طالعة دور اطلعي بالسلم وبلاش اسانسير، لو معاكي عربيتك ماتحطيهاش تحت المكان اللي انتي رايحاه، ابعديها شوية وامشي،،، والله كل دي حاجات بسيطة بس بتفرق جدا في الرشاقة والنشاط.

7.مش حقولك إلعبي رياضة كل يوم عشان مابقاش ببالغ لاني عارفة ان اغلبنا كسلانين، بس ده مايمنعش ان الرياضة فعلا غذاء الجسم ومضاد للإكتئاب،، طب الحل ايه ! كل يوم ياستي تشغلي اغنية بشرة خير 😀😀😀 ومش حقولك بقى ايه اللي حيجرالك، حتلاقي نفسك عمالة تنطي وترقصي ومش عارفة تلمي وسطك 😂😂😂 ، انا عن نفسي لما بكسل اعمل رياضة بشغل الاغنية 3 مرات وهي بتعمل الواجب وزيادة 😀

8. سواء كنتي بنت او زوجة او ام ، لااااازم تعملي لنفسك ساعة على الاقل توقعدي فيها مع نفسك، اعملي اللي انتي عايزاه، إقري كتاب، العبي، اسمعي موسيقى، إعملي اي حاجة بتحبيها،،، اوعي اوعي اوعي تعدي يومك من غير الساعة دي، ولوحدك مش مع اي بني أدم، لازم تدي لنفسك فرصة انها تتنفس عشان تعرفي تكملي وماتلاقيش نفسك بتنطفي يوم ورا يوم ووخداكي دوامة الحياة.

يارب تكون نصايحي عجبتكم وحبتوها، 💞 لينك البوست طبعا ضيفته لل pinned post زي مانا موضحة في الصورة ، وبكرة حكمل البوست عن حاجات لازم ناكولها او نشربها كل يوم عشان برضه صحتنا ورشاقتنا 🌷🌷
مش حوصيكم بقى تضيفوا صاحباتكم عشان اقدر اكمل واقولكم على الحاجات الحلوة اللي عندي 😉

***د.سالي فتحي ، اخصائية الطب النفسي وعلاج الادمان.

جروب الفيس بوك :

 Beauty secrets with dr. Sally Fathy

https://m.facebook.com/groups/1743509399258731?ref=m_notif&notif_t=like