العناية بمنطقة البيكيني

بوست العناية بمنطقة البيكيني 💞💞💞

** اولا قبل ما اقول النصايح بتاعتي لازم تعرفي ان دي اهم منطقة في جسمك لازم تهتمي بيها وبنضافتها، مش عشان هي مستخبية يبقى نهملها  ونركز في وشنا ولا شعرنا وبس، بالعكس ، المكان ده عشان دايما رطب وحرارته اعلى نسبيا من سطح جسمنا فهو معرض للإصابة بالبكتيريا اللي بتسبب الروايح الغير لطيفة والهرش ، ده طبعا لو اهملتيه بس.
** ثانيا ، تقريبا كل البنات بتشتكي ان المكان ده لونه اغمق من باقي الجلد وبيتعبوا نفسهم في كريمات التفتيح اللي في الاخر مش بتعمل حاجة لان السبب لسة موجود.
ركزي معايا ياقمر واوعدك انك لو عملتي بنصايحي لون المكان حيرجع زي لون باقي جسمك 😉

1. Hair removal : إزالة الشعر
اوعي تخلي المكان ده فيه شعر ابدا، ده سبب مهم للروايح اللي مش لطيفة واحيانا مع الحر ممكن يسبب هرش..طبعا كل واحدة حرة تعمل بالطريقة اللي تريحها ومتعودة عليها، انا بس بنصحك ان صحيا افضل طريقة هي ال shaving (الحلاقة) ، ده لان الحلاوة بتسبب ترهلات للمكان ده، وممكن يبقى سنك 30 وشكل المكان ده لسن واحدة 50 بسبب الترهل،،، العكس بقى مع ال shaving اللي فعلا بيخلي اللي سنها 50 تبان 30 بسبب تماسك المكان ده.
طبعا طرق ال shaving تطورت دلوقتي ومابقاش فيه داعي لاستخدام الامواس،،، دلوقتي اي مكنة ازالة الشعر ( silk épil) مثلا فيها رأس مخصصة لل shaving وميزتها انها بتشيله تماما وبيبقى ناعم جدا. ((خودي بالك ان وجود الشعر وخصوصا لو قصير بيدي ايحاء اكتر بإن المنطقة غامقة، عشان كدة اوعي تسيبيه)).
انا عن نفسي جربت فيليبس وبراون،، وانصحك ببراون لانها الافضل.
حتيجي واحدة تقول كدة حيطلع بسرعة، حقولك وماله اعملي كل يومين، وفي الاخر طبعا دي مجرد نصيحة ولو الطريقة دي غير مناسبة ليكي إعملي اللي يريحك  🌷

2. Cleansing : التنظيف
طبعا دي خطوة مافهاش نقاش، لازم يوميا تنظفي المكان كويس، بلاش تستخدمي اي صابون غير مخصص للمكان ده لان ال ph بتاعته ماتناسبش المكان ده. لازم يكون عندك غسول للمكان ده، وطبعا المقصود بالغسول هو تشطيف خارجي فقط، ماحدش يعمل ابدا دش داخلي لانه غلط. الغسول اللي بحبه اسمه lactacyd رائع وميزته انه شبهه الشاور جل بالظبط ولطيف جدا للمكان ده.
نصيحة: اوعي تنامي من غير ماتشطفي المكان كويس ولو بماية دافية.

3. Drying : التجفيف
اوعي تستخدمي التواليت وتسيبي المكان ده مبلول،، والله اعرف بنات كدة 😢. لازم تنشفي كويس وياريت مناديل التواليت تكون سميكة عشان ماتسيبش بواقي.
الفوط اليومية (panty liner) لازم تعودي نفسك عليها، موجودة طبعا ومتوفر منها انواع كتير، وتغيريها كل 4 ساعات،، عشان تفضلي جافة وتحميكي من اي بلل او رطوبة ممكن تساعد في وجود البكتريا. وعلى فكرة موجود منها فوط معطرة عشان تبقى ريحتك حلوة طول اليوم 😘.

4.scrubing : التقشير
ده من اهم الحاجات اللي بتساعد في علاج اللون الغامق... عودي نفسك لازم مرة كل اسبوع تعملي scrub بأي مقشر عندك،، انا بستخدم سكرب من bath and body works هو بفتافيت السكر الخشنة وفعلا رائع،،، لو صعب تجيبيه إعملي بسكرب جونسون اللي اتكلمت عنه في بوست البشرة. طبعا السكرب حتعمليه بإيدك مش بليفة، وتعملي المنطقة الامامية والخلفية وبعدين تشطفي بماية دافية.

5.moisturizing : الترطيب
لازم بعد السكرب تنشفي كويس و ترطبي المكان بمرطب طبيعي مافهوش اي كيماويات،، انا بستخدم مرطبات the body shop لانها طبيعية، لو صعب رطبي بزيت جونسون بتاع الاطفال. طبعا بعد السكرب والترطيب مش حتصدقي البياض والنعومة 😉

6.perfuming : التعطير
لو عملتي كل الخطوات السابقة طبعا حتبقى ريحتك حلوة على طول، الخطوة دي بقى اخر حاجة، وماينفعش تعمليها وانتي مش غاسلة المكان كويس، اوعي تعطري ببرفان، في كريمات معطرة perfumed cream  موجودة في محلات التجميل الكبيرة، طبعا الكريم اوعي تحطيه جوة، حتحطي حاجة بسيطة بس على الجلد الخارجي في الجانبين وفي المنطقة الخلفية..

**طبعا انا متأكدة انكم دلوقتي حاسين بإنتعاش فظيع  😀 مابالكم بقى لما تعملوا كدة 😉🌷.
**لينك البوست انا ضيفته لل pinned post عشان ترجعيله في اي وقت، وحتلاقي معاه كل لينكات البوستات اللي عملتها من اول ماعملت الجروب 💟
*** اقل حاجة ممكن تقدموهالي لو عجبكم البوست وعايزيني اقدم اكتر، لو سمحتي دوسي لايك للبوست وضيفي كل اصحابك البنات ، من غير دعمكم مش حقدر اكمل.💞💞🌷🌷🌷

*لو عجبكم البوست اعملوا شير لكل اللي تحبوا انهم يشوفوه ويستفادوا منه 💞

*حستنى تعليقاتكم على المدونة هنا او على الجروب بتاعي 

على الفيس بوك

  د.سالي فتحي ، اخصائية الطب النفسي وعلاج الادمان.

جروب الفيس بوك :

 Beauty secrets with dr. Sally Fathy

https://m.facebook.com/groups/1743509399258731?ref=m_notif&notif_t=like

Hair removal (shaving)

Cleansing

Panty liner

Scrub

Moisturizing

Perfuming