الحقيقة وراء فرد الشعر بالبروتين،،، مقدمة من د. خالد سامي

طبعا اكيد سمعتى عن فرد الشعر بالكرياتين و البروتين او عملتيهم بالفعل و الحقيقه انه العالم كله كان بيعملهم زيك بدون تركيز لحد سنه 2013 لما جينيفر أنستون عملت البروتين و شعرها اتحرق واضطرت انها تقص شعرها كله و ظهرت صورها فى الجرايد والمجلات وده شد العالم كله عشان ينتبه لخطورتهم ..

قبل ما نتكلم عنهم بالتفصيل فى كذبة تجميل خلينى أعرفك انه صدر قرار بمنع استخدامهم فى الاتحاد الاوروبى وكندا كما بدأت منظمه الدواء الأمريكيه بدراستهم لتحديد خطورتهم و اطلقت تحذيرات للامريكان من استخدامهم

مبدئيا انتى عارفه ايه هو البروتين او الكيراتين ؟
الشعر بعيدا عن تفاصيل تركيبه بيتغطى بطبقه من الكيراتين و دى اللى بتحمى الشعر وبتحافظ عليه . وظهرت فى البرازيل علاجات لفرد الشعر تعتمد بالاساس على الكيراتين او مجموعه من الاحماض الامينيه ( البروتين ) يتم باستخدام الحراره الصاقها بالشعر بحيث تحيط بالشعره فتقوم بفردها وتغليفها وحمايتها من اى عوامل ممكن تأثر عليها سواء طبيعيه زى المايه و الحراره او عوامل الجو والتلوث وغيرها فالشعر يتفرد و يتعالج التقصف او الهيشان او غيره وبيستمر تأثيرها لفترات متفاوته بتمتد ل 3 شهور .. كل العلاجات دى بتسمى Brazilian Blowouts  عشان لو حبيتى تدورى بنفسك عليها

طبعا فى مقارنات مابين الاتنين وايهما افضل واللى غالبا بتكون لصالح البروتين لانه اسهل فى عمله وبياخد وقت اقصر و تقدرى تغسلى شعرك وتتعاملى معاه بشكل طبيعى جدا بعده عكس الكيراتين اللى بتحتاجى تستنى 3 ايام على الاقل بعده ، كمان البروتين بيستخدم لكل انواع وحالات الشعر حتى المصبوغ و بيقعد فترات اطول لكن المقارنه مش موضوعنا حاليا

طيب يعنى فين المشكله برضه ؟
طبعا سمعتى كتير من الكوافيرات و الدكاتره وغيره ان الانواع الوحشه فيها فورمالين وانه ده مضر جدا وبيبوظ الشعر وانك لازم تستخدمى انواع نضيفه خاليه من الفورمالين وطبعا صالونات التجميل الكبيره عملتلك اعلانات عن البروتين والكيراتين الخالى من الفورمالين ، صح ؟

معلش بقى مضطر أقولك انهم ضحكوا عليكى أو هما نفسهم مضحوك عليهم لانهم لو عرفوا اللى بيعملوه للناس بيضرهم قد ايه شخصيا كانوا غيروا المهنه

مبدئيا كل المنتجات المستخدمه لفرد الشعر بتحتوى على مركب الفورمالديهايد وده الماده الاساسيه اللى مع الحراره بتكسر البروتين او الكيراتين وتلزقه حوالين الشعر ، وده معناه انه مفيش حاجه اسمها بروتين وكيراتين من غير فورمالين .. ماده الفورمالديهايد هى ماده مسرطنه وممنوع التعرض لها بتركيزات عاليه لانها بتسبب الليوكيميا ( سرطان الدم ) و سرطان البلعوم والحنجره كما ان التعرض لغاز الفورمالديهايد الناتج من تفاعله مع الحراره يسبب التهابات بالعين خاصه القرنيه و مع الاستمرار قد يسبب قرح بها ( خلى بالك من الكوافيرات اللى بيعملوه بكثره هتلاقيهم دايما بيشتكوا من حساسيه و حرقان بالعين مش بتتعالج مع حساسيه بالصدر وكحه )

طيب اومال ايه حكايه المنتجات الخاليه من الفورمالين ؟
بعد انتشار المعلومات اللى قولتهالك من شويه الشركات ابتدت تطلع منتجات تكتب عليها خاليه من الفورمالديهايد بسبب الذعر اللى أصاب الناس واساسا اللى ده شغلهم وعشان كده هيئه الرقابه على الصناعات فى الولايات المتحده بدأت تعمل ابحاث على صالونات التجميل فلقوا نسب عاليه من الفورمالديهايد موجوده فى الهواء فى الصالونات حتى مع استخدامهم المنتجات دى .. الحقيقه اللى طلعتها الابحاث هى ان الشركات استخدمت ماده اسمها ميثايل جلايكول بدل الفورمالديهايد عشان الناس تتطمن لكن الحقيقه ان الماده دى مع المايه والحراره بتتحول للفورمالديهايد عشان تعمل نفس الوظيفه فى فرد الشعر .. عشان كده ولايه كاليفورنيا مثلا اجبرت الشركات على انها تكتب على منتجاتها انها تحتوى على الفورمالديهايد ومنعتهم من استخدام عبارات ( خالى من الفورمالديهايد ) اللى الشركات بتحطها فى ولايات تانيه وخارج الولايات المتحده

ايه الوضع حاليا طيب ؟
الحقيقه انه ال Brazilian Blowout  أصبح ممنوع فى الاتحاد الاوروبى و كندا بشكل نهائى بينما فى الولايات المتحده لا يزال تحت الدراسه من منظمه الدواء الامريكيه وان كانت حذرت من استخدامه .. فى البرازيل و باقى العالم بيستخدم بحريه وبكثره وكل البنات و السيدات بيتهافتوا عليه مش هتكلم عن مصر لان اصلا مفيش رقابه على حاجه و اصلا انتى عمرك ما هتعرفى مصدره ولا صناعته لانى احب اقولك ان الصالونات نفسهم ميعرفوش والشركات و المستوردين بيضحكوا عليهم

عارف هتسألينى طب أعمله ولا لأ وهل هو مفيد ولا مضر ؟
من ناحيه مفيد فهو مفيد لانه بيصلح الهيشان والتقصف وبيفرد الشعر وبيخلى شكله أفضل ولو انتى جربتيه او حد تعرفيه جربه هيقولك ده ، طبعا ممكن يحصل منه مشاكل زى ما حكيتلك ان جينيفر انستون شعرها باظ واضطرت تقصه بسبب البروتين
 
طيب بالنسبه لمخاطره ، برضه زى ما قولنا كل المنتجات دى فيها فورمالديهايد ودى ماده مسرطنه بتسبب سرطان البلعوم وسرطان الدم مع التعرض المستمر غير الاثار الجانبيه زى حساسيه العين و الصدر يعنى لو دى شغلتك بلاش منها لانك بعد كام سنه للاسف نسبه اصابتك بالسرطانات دى هتكون مرتفعه جدا ، لكن لو بتعمليه لشعرك على فترات متباعده كل سنه مثلا فطبعا تعرضك ده قليل واحتماليه اصابتك بالسرطان موجوده ولكن بنسبه اقل من العاملين الا لو انتى مدمنه على فرد شعرك كل 3 شهور لان ده تعرض مستمر .. فى النهايه زى اى حاجه فى الحياه  انتى المسئوله ، اوزنى الفوايد والاضرار و اختارى الأنسب ليكى طالما عرفتى المعلومات كلها بشكل صحيح

أتمنى أكون قدرت أوصلك المعلومات بشكل واضح ومبسط وعذرا للاطاله.. ومع كل حلقه من حلقات كذبه تجميل هحاول أساعدك تعرفى الحقايق اللى بيداروها عنك .. فتابعينا فى حلقاتنا القادمه ان شاء الله

د / خالد سامى